തിരുവനന്തപുരം: കേരള പൊലിസിന്റെ വെബ്‌സൈറ്റില്‍ നിന്ന് പൊതുജനങ്ങള്‍ക്ക് എഫ്.ഐ.ആറിലെ വിവരങ്ങള്‍ ലഭിക്കുന്ന സംവിധാനം പുനഃസ്ഥാപിക്കണമെന്ന ആവശ്യത്തില്‍ മനുഷ്യാവകാശ കമ്മിഷന്‍ സംസ്ഥാന പൊലിസ് മേധാവിയില്‍ നിന്ന് വിശദീകരണം തേടി. നാലാഴ്ചയ്ക്കകം റിപ്പോര്‍ട്ട് നല്‍കണമെന്ന് കമ്മിഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് ആവശ്യപ്പെട്ടു.

കേരള പൊലിസ് വെബ്‌സൈറ്റില്‍ നിന്ന് പൊതുജനങ്ങള്‍ക്ക് എഫ്.ഐ.ആറിലെ വിവരങ്ങള്‍ ലഭിക്കാന്‍ പരാതിക്കാരന്റെയോ പ്രതിയുടെയോ പേരോ പരാതി തിയതിയോ നല്‍കിയാല്‍ മതിയായിരുന്നു. എന്നാല്‍, ഇപ്പോള്‍ എഫ്.ഐ.ആര്‍ നമ്പര്‍ നല്‍കിയാല്‍ മാത്രമേ വിവരങ്ങള്‍ ശേഖരിക്കാന്‍ കഴിയുകയുള്ളൂ. എഫ്.ഐ.ആര്‍ നമ്പര്‍ അറിയണമെങ്കില്‍ ബന്ധപ്പെട്ട പൊലിസ് സ്റ്റേഷനെയോ കോടതിയെയോ ആശ്രയിക്കണം. ഇത് അറിയാനുള്ള അവകാശത്തിന്റെ ലംഘനമാണെന്നാണ് പരാതി.