പുല്‍പ്പള്ളി: ടൗണിലെ ഗതാഗതക്കുരുക്കിന് പരിഹാരം കാണാന്‍ നടപടി സ്വീകരിക്കണമെന്ന് ആവശ്യം ശക്തമാകുന്നു. ടൗണില്‍ വാഹനങ്ങള്‍ തലങ്ങും വിലങ്ങും പാര്‍ക്ക് ചെയ്യുന്നത് ഗതാഗതക്കുരുക്കിന് കാരണമായിട്ടും യാതൊരു നടപടിയുമില്ല.
വിവിധ സംഘടനകളും വ്യാപാരികളും രാഷ്ട്രീയ കക്ഷികളും ട്രാഫിക് പരിഷ്‌കരണം നടപ്പിലാക്കണമെന്ന് ആവശ്യപ്പെടുന്നുണ്ടെങ്കിലും പഞ്ചായത്തിന്റെ ഭാഗത്ത് നിന്ന് ഇതിനാവശ്യമായ യാതൊരു നടപടിയുമുണ്ടാകുന്നില്ല.
ടൗണിലെ ഗതാഗതക്കുരുക്കിന് പരിഹാരം കാണുന്നതിനോടൊപ്പം ദൂരെ സ്ഥലങ്ങളിലേക്കുള്ള വാഹനങ്ങള്‍ ടൗണില്‍ പ്രവേശിക്കാത്ത ബൈപാസ് വഴി തിരിച്ചുവിടാനുള്ള നടപടി വേണമെഅന്ന് ആവശ്യമുയരുന്നുണ്ടെങ്കിലും ഇതിന് പരിഹാരം കാണാന്‍ ആരും തയാറാകുന്നില്ല.
സര്‍ക്കാര്‍ അശുപത്രി മുതല്‍ പുല്‍പ്പള്ളി ക്ഷേത്രം വരെയും മിഷന്‍ ആശുപത്രി മുതല്‍ ഉദയ തിയേറ്റര്‍ വരെയുള്ള ഭാഗങ്ങളില്‍ വാഹനങ്ങള്‍ പാര്‍ക്ക് ചെയ്യുന്നത് കാരണം ഗതാഗതക്കുരുക്ക് പതിവായിരിക്കുകയാണ്.
ടൗണില്‍ ഹോം ഗാര്‍ഡുകളുടെ സേവനമുണ്ടെങ്കിലും വാഹനപ്പെരുപ്പം മൂലം ട്രാഫിക് നിയന്ത്രിക്കാന്‍ കഴിയാത്ത അവസ്ഥയാണ്.