മനാമ: ഗള്‍ഫ് നാടുകളില്‍നിന്ന് പ്രത്യേക ചാര്‍ട്ടേഡ് വിമാനങ്ങളില്‍ നാട്ടിലേക്ക് പോകുന്നവര്‍ 48 മണിക്കൂറിനുള്ളില്‍ കൊവിഡ് പരിശോധന നടത്തിയ റിപ്പോര്‍ട്ട് സമര്‍പ്പിക്കണമെന്ന തീരുമാനത്തില്‍നിന്ന് സംസ്ഥാന സര്‍ക്കാര്‍ പിന്മാറണമെന്ന് ബഹ്‌റൈന്‍ കെ.എം.സി.സി ആവശ്യപ്പെട്ടു. 

നിലവില്‍ വന്ദേഭാരത് മിഷന്‍ നിബന്ധനകള്‍ പാലിച്ചാണ് കാരുണ്യ സംഘടനകളും മറ്റും ചാര്‍ട്ടേഡ് വിമാന സര്‍വിസുകള്‍ നടത്തുന്നത്. സര്‍ക്കാര്‍ തീരുമാനം പ്രവാസിവിരുദ്ധവും അവര്‍ നാടണയുന്നതിന് തുരങ്കംവയ്ക്കുന്ന നടപടിയുമാണെന്ന് സംസ്ഥാന പ്രസിഡന്റ് ഹബീബ് റഹ്മാന്‍, ജനറല്‍ സെക്രട്ടറി അസൈനാര്‍ കളത്തിങ്കല്‍ എന്നിവര്‍ പറഞ്ഞു.

 

 

 

 

മനാമ: ചാര്‍ട്ടേഡ് വിമാനങ്ങളില്‍ മടങ്ങുന്ന ഗള്‍ഫ് പ്രവാസികള്‍ കൊവിഡ് നെഗറ്റീവ് ആണെന്ന് തെളിയിക്കുന്ന പരിശോധനാ ഫലം കൈവശം വയ്ക്കണമെന്ന സംസ്ഥാന സര്‍ക്കാരിന്റെ സര്‍ക്കുലറിനെതിരേ ബഹ്‌റൈനിലെ സി.പി.എം അനുകൂല പ്രവാസി സംഘടനയായ 'ബഹ്‌റൈന്‍ പ്രതിഭ'യും രംഗത്ത്.

സര്‍ക്കാര്‍ തീരുമാനം ഗള്‍ഫില്‍നിന്ന് യാത്ര ചെയ്യാന്‍ ഉദ്ദേശിക്കുന്ന പ്രവാസികള്‍ക്കിടയില്‍ വലിയ അസ്വസ്ഥത സൃഷ്ടിച്ചിരിക്കുകയാണെന്ന് അവര്‍ പ്രസ്താവനയില്‍ അറിയിച്ചു. 

പ്രവാസികള്‍ക്ക് വലിയ ബുദ്ധിമുട്ടുണ്ടാക്കുന്ന ഉത്തരവ് പുനഃപരിശോധിച്ച് ആവശ്യമായ നടപടികള്‍ സ്വീകരിക്കാന്‍ സംഘടന കേരള മുഖ്യമന്ത്രിയോട് അപേക്ഷിച്ചിട്ടുണ്ടെന്ന് ഭാരവാഹികള്‍ പറഞ്ഞു.