ടുറിന്‍: പെനല്‍റ്റി വീരന്‍മാരില്‍ ഒരാളായ റൊണാള്‍ഡോയ്ക്ക് ഇത്തവണ പിഴച്ചു. എ.സി മിലാനെതിരായ ഇറ്റാലിയന്‍ കപ്പില്‍ നിര്‍ണായകമായ പെനല്‍റ്റി തുലച്ചെങ്കിലും യുവന്റസ് ഫൈനലിലെത്തിയതിന്റെ ആവേശത്തില്‍, നിരാശ ആഘോഷമാക്കി മാറ്റി സൂപ്പര്‍ താരം ക്രിസ്റ്റ്യാനോ റൊണാള്‍ഡോ. ഇന്നലെ നടന്ന ഇറ്റാലിയന്‍ കപ്പിന്റെ രണ്ടാംപാദ മത്സരത്തിലാണ് വീണുകിട്ടിയ പെനല്‍റ്റി വലയിലെത്തിക്കാന്‍ റൊണാള്‍ഡോയ്ക്ക് കഴിയാതെ പോയത്. പക്ഷേ, മത്സരം ഗോള്‍രഹിത സമനിലയില്‍ അവസാനിച്ചതോടെ മിലാന്റെ തട്ടകത്ത് നടന്ന എവേ മാച്ചിന്റെ ആനുകൂല്യത്തില്‍ യുവന്റസ് ഫൈനലിലേക്ക് കുതിക്കുകയായിരുന്നു. മിലാനില്‍ നടന്ന മത്സരം 1-1ന് സമനിലയില്‍ കലാശിച്ചിരുന്നു. 

മത്സരത്തിലെ 16ാം മിനുട്ടിലാണ് യുവന്റസിന് മുന്നിട്ടു നില്‍ക്കാനുള്ള അവസരം പെനല്‍റ്റിയിലൂടെ വീണു കിട്ടിയത്. വാറിലൂടെയായിരുന്നു പെനല്‍റ്റി ലഭിച്ചത്. പെനല്‍റ്റിയെടുക്കാനായി വിശ്വസ്തതയോടെ റോണോയെ ഏല്‍പ്പിച്ച പരിശീലകന്‍ മൗറീഷ്യോ സാറിക്ക് തെറ്റി. ഇടത് മൂലയിലേക്ക് ഷോട്ട് ഉതിര്‍ത്തെങ്കിലും പോസ്റ്റില്‍ തട്ടി മടങ്ങിയതോടെ ആശിച്ച ഗോള്‍ നഷ്ടമായി. 

 അടുത്ത മിനുട്ടില്‍ തന്നെ ആന്ദ്രേ റെബിച്ച് ചുവപ്പുകാര്‍ഡ് കണ്ട് മടങ്ങിയതോടെ മിലാന്‍ 10 പേരായി ചുരുങ്ങി. എങ്കിലും യുവന്റസ് മുന്നേറ്റനിര അലക്ഷ്യമായി കളിച്ചതോടെ ടീമിന് ഗോള്‍ പിറക്കാതെ പോയി. ഒടുവില്‍ ഹോം ഗ്രൗണ്ടില്‍ കളിച്ച് ആധിപത്യം നേടിയതിന്റെ അടിസ്ഥാനത്തില്‍ യുവന്റസ് ഫൈനലില്‍ പ്രവേശിക്കുകയായിരുന്നു.