കല്‍പ്പറ്റ: ജില്ലയിലെ വരള്‍ച്ചാ ബാധിത പ്രദേശങ്ങള്‍ സന്ദര്‍ശിക്കുന്നതിനും വരള്‍ച്ചയുടെ കാഠിന്യം വിലയിരുത്തുന്നതിനും ആറംഗ കേന്ദ്രസംഘം ഇന്ന് ജില്ല സന്ദര്‍ശിക്കും. കാര്‍ഷിക- ധനകാര്യ- വൈദ്യുത-കര്‍ഷകക്ഷേമ മന്ത്രാലയങ്ങളെ പ്രതിനിധീകരിച്ച് അശ്വിനി കുമാര്‍, ഡോ.കെ.പൊന്നുസാമി, അഞ്ജുലി ചന്ദ്ര, രാഹുല്‍ സിങ്, ഗോപാല്‍ പ്രസാദ്, വിജയ് രാജ്‌മോഹന്‍ എന്നിവരാണ് സംഘത്തിലുള്ളത്. രാവിലെ 11ന് കലക്ടറേറ്റില്‍ നിന്ന് പുറപ്പെടുന്ന സംഘം പുല്‍പ്പള്ളിയിലെയും മുള്ളന്‍കൊല്ലിയിലെയും വരള്‍ച്ചാ ബാധിതപ്രദേശങ്ങള്‍ സന്ദര്‍ശിച്ച് വൈകീട്ട് 3.30ന് കലക്ടറേറ്റിലെത്തി ജില്ലാ കലക്ടര്‍ ഡോ.ബി.എസ് തിരുമേനിയുമായി കൂടിക്കാഴ്ച നടത്തിയശേഷം മടങ്ങും.