മണ്ണഞ്ചേരി: സ്‌കൂള്‍ പരിസരത്ത് ലഹരിവസ്തുക്കള്‍ കൈമാറ്റം ചെയ്യാന്‍ ശ്രമിച്ച രണ്ടംഗസംഘത്തെ രക്ഷിതാക്കള്‍ പിടികൂടി. ആലപ്പുഴ നഗരത്തില്‍ ചാത്തനാട് വാര്‍ഡില്‍ കുറ്റിവേലിക്കകത്ത് വീട്ടില്‍ മുനീര്‍ (20), മണ്ണഞ്ചേരി പഞ്ചായത്തില്‍ 16-ാം വാര്‍ഡില്‍ നേതാജിയില്‍ മണ്ണേഴത്ത് വെളിവീട്ടില്‍ അബ്ബാസ് (അജാസ്-18) എന്നിവരാണ് പിടിയിലായത്. വന്‍തോതില്‍ ലഹരിവില്‍പ്പന നടക്കുന്നതായി വിവരം ലഭിച്ചതിനെതുടര്‍ന്ന് രക്ഷിതാക്കള്‍ ലഹരിവിരുദ്ധ സ്‌ക്വാഡ് സ്‌കൂളില്‍ രൂപീകരിച്ചിരുന്നു.
ഈ സ്‌ക്വാഡാണ് ലഹരിവില്‍പ്പനക്കാരായ യുവാക്കളെ പിടികൂടി പൊലീസിന് കൈമാറിയത്. ദിവസവും നാലുപേരടങ്ങുന്ന രക്ഷിതാക്കളുടെ സംഘം ഇവിടെ നിരിക്ഷണം നടത്തിവരുകയായിരുന്നു. മണ്ണഞ്ചേരി ഗവ: ഹൈസ്‌കൂള്‍ പരിസരത്ത് ഇന്നലെ വൈകുന്നേരം നാലുമണിക്കായിരുന്നു രക്ഷിതാക്കള്‍ പരിശോധന നടത്തിയത്.
സ്‌കൂള്‍ വിടുന്ന നേരത്താണ് സംഘം കുട്ടികള്‍ക്ക് ലഹരിവസ്തുക്കള്‍ നല്‍കിയിരുന്നത്. പിടികൂടപ്പെട്ട യുവാക്കള്‍ക്ക് ഇത്തരം ഉല്‍പ്പന്നങ്ങള്‍ എവിടെനിന്നും ലഭിക്കുന്നതാണെന്ന് പൊലീസ് അന്വേഷിച്ചുവരുകയാണ്. പിടിലായവരെ നാളെ കോടതിയില്‍ ഹാജരാക്കുമെന്ന് മണ്ണഞ്ചേരി പൊലീസ് പറഞ്ഞു.
ഇന്നലെ ആര്യാട് പഞ്ചായത്തിലെ ലഹരിവിരുദ്ധ ക്യാമ്പയിനില്‍ പങ്കെടുത്തിരുന്നു. ഈ സമ്മേളനത്തില്‍ വച്ച് എക്‌സൈസ് കമ്മീഷണര്‍ ഋഷിരാജ് സിംഗ്‌രക്ഷിതാക്കളോടും അദ്ധ്യാപകരോടും ലഹരിവില്‍പ്പനക്കെതിരെ ജാഗ്രതപാലിക്കാന്‍ ആഹ്വാനം ചെയ്തിരുന്നു.