തിരുവനന്തപുരം: സംസ്ഥാനത്തെ യത്തീംഖാനകളിലെ   വിദ്യാര്‍ഥികളെ പങ്കെടുപ്പിച്ച്  തിരുവനന്തപുരം യത്തീംഖാന സംഘടിപ്പിക്കുന്ന ആള്‍ കേരള യത്തീം സ്റ്റുഡന്റ്‌സ്   25ന് വൈകുന്നേരം നാലിന്  മന്ത്രി കടകംപള്ളി സുരേന്ദ്രന്‍ ഉദ്ഘാടനം ചെയ്യും. വള്ളക്കടവ് യത്തീംഖാന കോംപ്ലക്‌സില്‍ യത്തീംഖാന പ്രസിഡന്റ് എം.കെ നാസറുദ്ദീന്‍ അധ്യക്ഷത വഹിക്കുന്ന ചടങ്ങില്‍ വി.എസ് ശിവകുമാര്‍ എം.എല്‍.എ മുഖ്യാതിഥിയായിരിക്കും.തിരുവനന്തപുരം യത്തീംഖാനയുടെ 47ാമത് വാര്‍ഷികത്തിന്റെ ഭാഗമായാണ് 25, 26, 27 തീയതികളില്‍ ഫെസ്റ്റ് സംഘടിപ്പിക്കുന്നതെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.27ന്  ഫെസ്റ്റിന്റെ സമാപന സമ്മേളനം പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും.  മന്ത്രി ഡോ. കെ.ടി ജലീല്‍ സമ്മാന  വിതരണം നിര്‍വഹിക്കും.  എം എല്‍.എമാരായ പി.ടി.എ റഹീം, പി ഉബൈദുള്ള, മുന്‍ എം.എല്‍.എ വി ശിവന്‍കുട്ടി എന്നിവര്‍ സമാപനസമ്മേളനത്തില്‍ പങ്കെടുക്കും.
25ന് രാവിലെ 10ന് മത്സരപരിപാടികള്‍ തിരുവനന്തപുരം മേയര്‍ അഡ്വ. വി.കെ പ്രശാന്ത് ഉദ്ഘാടനം ചെയ്യും. മൂന്ന് ദിവസം നീണ്ടു നില്‍ക്കുന്ന  ഫെസ്റ്റില്‍ കാസര്‍ഗോഡ് മുതല്‍ തിരുവനന്തപുരം വരെയുള്ള ആയിരത്തോളം മത്സരാര്‍ഥികള്‍ മാറ്റുരക്കും.
ഇതോടനുബന്ധിച്ച്  വള്ളക്കടവ് അറഫാ ഓഡിറ്റോറിയത്തില്‍ അന്തര്‍ദേശീയ നിലവാരത്തില്‍ ഖുര്‍ആന്‍ പ്രദര്‍ശനവും സംഘടിപ്പിക്കും. പ്രദര്‍ശനത്തിന്റെ ഉദ്ഘാടനം  ഇന്ന് വൈകുന്നേരം അഞ്ചിന് കേരളാ മുസ്‌ലിം ജമാഅത്ത് ഫെഡറേഷന്‍ സംസ്ഥാന ജനറല്‍ സെക്രട്ടറി കടയ്ക്കല്‍ അബ്ദുള്‍ അസീസ് മൗലവി നിര്‍വഹിക്കും.
ഇന്ന് മുതല്‍ 27 വരെ എല്ലാ ദിവസവും രാത്രി ഒന്‍പതിന് വിവിധ പള്ളികളിലെ ചീഫ് ഇമാമുമാരുടെ വിജ്ഞാന സദസും നടക്കും. ഇന്നു മുതല്‍ യഥാക്രമം അബുല്‍ ഫിദാ ഉവൈസ് അല്‍ അമാനി, ഫിറാസ് ഖാന്‍ ബാഖവി, അബു റബീഅ്  സ്വദഖത്തുള്ള ബാഖവി, പാച്ചല്ലൂര്‍ അബ്ദു സലീം മൗലവി  നവാസ് മന്നാനി പനവൂര്‍  എന്നിവര്‍ പ്രഭാഷണം നടത്തും.
24ന് നടക്കുന്ന സൗഹൃദസദസ് ശശി തരൂര്‍ എം.പി ഉദ്ഘാടനം ചെയ്യും. ഡോ. എ സമ്പത്ത് എം.പി മുഖ്യാതിഥിയായിരിക്കും. മേജര്‍ ആര്‍ച്ച് ബിഷപ്പ് ഡോ. സാമുവല്‍ മാര്‍ ഐറേനിയസ്, സ്വാമി ഗുരുരത്‌നം ജ്ഞാന തപസ്വി. വള്ളക്കടവ് ചീഫ് ഇമാം മുഹമ്മദ് അസ്‌ലം ബാഖവി, പത്തനാപുരം ഗാന്ധിഭവന്‍ സെക്രട്ടറി ഡോ. പുനലൂര്‍ സോമരാജന്‍ തുടങ്ങിയവര്‍ സംസാരിക്കും.
26ന് വൈകിട്ട് അഞ്ച് മുതല്‍ രാത്രി 8.30 വരെ ഹാഫിസ് മുഹമ്മദ് വര്‍ക്കല നടത്തുന്ന ഖുര്‍ആന്‍ വിസ്മയ വിരുന്ന് ഡെപ്യൂട്ടി സ്പീക്കര്‍ വി ശശി ഉദ്ഘാടനം ചെയ്യും.  വാര്‍ത്താസമ്മേളനത്തില്‍ തിരുവനന്തപുരം യത്തീംഖാന പ്രസിഡന്റ് എം.കെ നാസറുദ്ദീന്‍, ജനറല്‍സെക്രട്ടറി അഡ്വ.എം.എം ഹുസൈന്‍, എ.സൈഫുദ്ദീന്‍, എം.കെ അബ്ദുല്‍ റഹീം, എം.മുഹമ്മദ് മാഹീന്‍ എന്നിവര്‍ പങ്കെടുത്തു.