കൊല്‍ക്കത്ത: കടുത്ത വയറുവേദന കാരണം ആശുപത്രിയില്‍ ചികിത്സതേടിയ ബൂര്‍ഭൂം സ്വദേശിയായ മുപ്പതുകാരി ഡോക്ടര്‍മാരില്‍നിന്ന് ആ സത്യമറിഞ്ഞപ്പോള്‍ ഞെട്ടി. ശരിക്കും അവര്‍ സ്ത്രീയായിരുന്നില്ല. പുരുഷനാണെന്നാണ് ഡോക്ടര്‍മാര്‍ അറിയിച്ചത്. 22,000 പേരില്‍ ഒരാള്‍ക്കു മാത്രമുണ്ടാകുന്ന ജനിതക പ്രത്യേകതയായിരുന്നു അത്. ഈ വ്യക്തിയുടെ ശരീരത്തിനുള്ളില്‍ വൃഷണങ്ങളുണ്ടെന്നു കണ്ടെത്തുകയും ഇവയ്ക്കു കാന്‍സറാണെന്നു സ്ഥിരീകരിക്കുകയും ചെയ്തിട്ടുണ്ട്.

ഒന്‍പതു വര്‍ഷം മുന്‍പ് ഈ വ്യക്തി മറ്റൊരാളെ വിവാഹം കഴിക്കുകയും ചെയ്തിട്ടുണ്ട്. ഇരുവരെയും നിലവില്‍ കൗണ്‍സിലിങ്ങിനു വിധേയരാക്കുന്നുണ്ട്. കാഴ്ചയിലും ശാരീരിക പ്രകൃതത്തിലും ശബ്ദത്തിലും സ്ത്രീയായിരുന്ന ഈ യുവാവ്, 30 വര്‍ഷം ജീവിച്ചതും സ്ത്രീയായായിരുന്നു. ബാഹ്യ ലൈംഗിക അവയവങ്ങളുമുണ്ടെങ്കിലും ജന്മനാ ഗര്‍ഭപാത്രമോ അണ്ഡാശയമോ ഉണ്ടായിരുന്നില്ല. ഇതുവരെ ആര്‍ത്തവവും ഉണ്ടായിട്ടില്ല. വയറുവേദനയെ തുടര്‍ന്ന് നേതാജി സുഭാഷ് ചന്ദ്രബോസ് കാന്‍സര്‍ ആശുപത്രിയില്‍ ചികിത്സതേടിയിരുന്ന ഈ യുവാവ്, ഡോ. അനുപം ദത്തയും സംഘവും നടത്തിയ പരിശോധനയിലൂടെയാണ് തന്റെ യഥാര്‍ഥ വ്യക്തിത്വം തിരിച്ചറിഞ്ഞത്. നിലവില്‍ കീമോതെറാപ്പിക്കു വിധേയനായ രോഗിയുടെ ആരോഗ്യനില തൃപ്തികരമാണ്.

സംഭവത്തെ തുടര്‍ന്ന് ഈ വ്യക്തിയുടെ 28കാരിയായ സഹോദരിയെയും ഡോക്ടര്‍മാര്‍ പരിശോധിച്ചു. ഇവര്‍ക്ക് ആന്‍ഡ്രോജന്‍ ഇന്‍സെന്‍സിറ്റിവിറ്റി സിന്‍ഡ്രോം ആണെന്നു കണ്ടെത്തിയിട്ടുമുണ്ട്. ജനിച്ചത് പുരുഷനായാണെങ്കിലും ശാരീരിക പ്രത്യേകതകള്‍ സ്ത്രീകളുടേതാകുന്നതാണ് ഈ അവസ്ഥ.