ദുബൈ:  യു.എസും ഇസ്‌റാഈലും ഇറാനെ ആക്രമിച്ചതിനെത്തുടര്‍ന്ന് പശ്ചിമേഷ്യയില്‍ രൂപപ്പെട്ട സംഘര്‍ഷാവസ്ഥയുടെ പശ്ചാത്തലത്തില്‍ വിമാനങ്ങള്‍ റദ്ദാക്കപ്പെട്ടതിനാല്‍ യുഎഇയില്‍ കുടുങ്ങിപ്പോയ വിനോദസഞ്ചാരികളെ ഹോട്ടലുകളില്‍ നിന്ന് ഒഴിപ്പിക്കരുതെന്ന് ദുബൈ ഇക്കണോമി ആന്‍ഡ് ടൂറിസം വകുപ്പ് (DET) കര്‍ശന നിര്‍ദ്ദേശം നല്‍കി. പ്രതിസന്ധിയിലായ സന്ദര്‍ശകര്‍ക്ക് ആവശ്യമായ എല്ലാ പിന്തുണയും നല്‍കണമെന്ന് ഹോട്ടല്‍ ഉടമകള്‍ക്ക് അയച്ച ഇമെയിലില്‍ വകുപ്പ് വ്യക്തമാക്കി.
ചെക്ക് ഔട്ട് ചെയ്യേണ്ട സമയമായിട്ടും വിമാന സര്‍വീസുകള്‍ ഇല്ലാത്തതിനാല്‍ പോകാന്‍ കഴിയാത്തവര്‍ക്ക്, അവരുടെ ആദ്യ ബുക്കിംഗിലെ അതേ നിബന്ധനകളോടെ താമസം നീട്ടിനല്‍കണം. ഒരു കാരണവശാലും അതിഥികളെ ഹോട്ടലുകളില്‍ നിന്ന് പുറത്താക്കാന്‍ പാടില്ലെന്നും അധികൃതര്‍ അറിയിച്ചു.

പ്രധാന നിര്‍ദ്ദേശങ്ങള്‍:

* താമസസൗകര്യം നീട്ടിനല്‍കുന്നതിനുള്ള തുക നല്‍കാന്‍ അതിഥിക്ക് സാധിക്കാത്ത സാഹചര്യമുണ്ടെങ്കില്‍, ഹോട്ടലുകള്‍ വിവരം ഉടന്‍ തന്നെ DETയെ അറിയിക്കണം. അതിഥിയുടെ ആദ്യത്തെ താമസ കാലാവധി, നീട്ടിനല്‍കിയ ദിവസങ്ങള്‍ തുടങ്ങിയ വിവരങ്ങള്‍ ഇതിനായി നല്‍കണം.
* സര്‍ക്കാര്‍ സഹായം: കുടുങ്ങിക്കിടക്കുന്ന യാത്രക്കാരുടെ താമസത്തിനും ഭക്ഷണത്തിനുമുള്ള ചെലവുകള്‍ യുഎഇ ജനറല്‍ സിവില്‍ ഏവിയേഷന്‍ അതോറിറ്റി വഹിക്കുമെന്ന് നേരത്തെ അറിയിച്ചിരുന്നു.
* അബൂദബിയിലെ നടപടി: അബൂദബിയിലെ ഹോട്ടലുകളിലും സമാനമായ നിര്‍ദ്ദേശം നല്‍കിയിട്ടുണ്ട്. അവിടത്തെ സാംസ്‌കാരിക വിനോദസഞ്ചാര വകുപ്പ് അധികമായി വരുന്ന താമസച്ചെലവ് നേരിട്ട് വഹിക്കുമെന്ന് ഉറപ്പുനല്‍കി.

Hotel establishments in Dubai have received an email from the Department of Economy and Tourism (DET) instructing them to extend all necessary support to tourists impacted by the flight cancellations or delays.