പെരുമ്പാവൂര്‍: കുറ്റ്യേലി കനാലില്‍ വെള്ളം വിടാത്തതുകൊണ്ട് മുടക്കുഴ പഞ്ചായത്തിലെ മുഴുവന്‍ പാടശേഖരങ്ങളും കിണറുകളും കുളങ്ങളും വരണ്ടുണങ്ങി. ഇതോടെ പ്രദേശത്ത് കുടിവെള്ളക്ഷാമവും അതിരൂക്ഷമായി.  പുഞ്ചകൃഷി ചെയ്ത കര്‍ഷകരെയും പതിനായിരക്കണക്കിന് ഏത്തവാഴ, ജാതി, കൊക്കോ എന്നിവ കൃഷി ചെയ്തിട്ടുള്ളവരെയും പ്രതിസന്ധിയിലാക്കിയിരിക്കുകയാണ്. ആഴ്ചയില്‍ രണ്ട് ദിവസം കനാലില്‍ വെള്ളം വന്നുകൊണ്ടിരുന്നതാണെന്ന് നാട്ടുകാര്‍ പറഞ്ഞു.  എന്നാല്‍ കഠിന വേനലായിട്ടുപോലും മൂന്നാഴ്ചയായി വെള്ളം വരുന്നില്ലെന്നും പരാതിയുണ്ട്. കനാലില്‍ വെള്ളം വന്നാലെ സമീപ പ്രദേശങ്ങളിലെ കിണറുകളില്‍ വെള്ളമുണ്ടാവുകയുള്ളൂ. പൊരിയുന്ന വെയിലും അന്തരീക്ഷ ചൂടും വരള്‍ച്ചയും മൂലം ജനങ്ങള്‍ ബുദ്ധിമുട്ടിലാണ്. മഴക്കാലം വരുന്നതുവരെ കനാലില്‍ എല്ലാ ദിവസവും വെള്ളം തുറന്നുവിട്ട് ജനങ്ങളെ സഹായിക്കണമെന്ന് പെരിയാര്‍വാലി അധികൃതരോട് മുടക്കുഴ കൃഷിവികസന സമിതി ആവശ്യപ്പെട്ടു.