പന്തീരാങ്കാവ്: 30 അടിയോളം ഉയരത്തില്‍ നിന്ന് മണ്ണും കല്ലുമിടിഞ്ഞ് വീട് തകര്‍ന്നു. പള്ളിപ്പുറം പടിഞ്ഞാറ് വീട്ടില്‍ മേത്തല്‍ അച്യുതന്റെ വീടാണ് ഇന്നലെ ഉച്ചയോടെ തകര്‍ന്നത്. സാമ്പത്തിക പ്രയാസം കാരണം സണ്‍ഷെയ്ഡ് വരെ പണിത, പൂര്‍ത്തിയാക്കാനാവാത്ത വീടിന്റെ മേല്‍ ഭാഗത്ത് ഷീറ്റ് വലിച്ച് കെട്ടിയാണ് അച്യുതനും കുടുംബവും താമസിക്കുന്നത്.
വീടിന് തൊട്ടടുത്ത് വ്യാപകമായി കുന്നിടിച്ച് നിര്‍മാണ പ്രവൃത്തി നടക്കുന്നുണ്ട്. കഴിഞ്ഞദിവസവും പ്രവൃത്തി നടന്നിരുന്നു. അച്യുതനും ഭാര്യയും വീട്ടിലില്ലാത്തപ്പോഴാണ് അപകടം നടന്നത്. ഉച്ചയോടെ അച്യുതന്റെ മകന്‍ നവനീത് തൊട്ടടുത്ത വീട്ടിലേക്ക് ഭക്ഷണം കഴിക്കാന്‍ പോയ സമയത്താണ് അപകടം സംഭവിച്ചത്.
വലിയ ചെങ്കല്ല് വീണ് വീടിന്റെ ചുമരും അടിത്തറയും തകര്‍ന്നു. പുനര്‍നിര്‍മിക്കാനാവാത്ത വിധം വീട് പൂര്‍ണമായും തകര്‍ന്നിട്ടുണ്ട്. ഭാഗികമായി മാത്രം നിര്‍മാണം നടത്തിയ വീടിന് രണ്ട് ലക്ഷത്തോളം രൂപ കടം നിലനില്‍ക്കേയാണ് അപകടം സംഭവിച്ചത്.