ന്യൂഡല്‍ഹി: കേന്ദ്രസര്‍ക്കാരിന്റെ നിരോധനത്തിനു പിന്നാലെ ടിക് ടോക് ഗൂഗ്ള്‍ പ്ലേ സ്റ്റോറില്‍ നിന്നും ആപ്പിള്‍ ആപ്പ് സ്റ്റോറില്‍നിന്നും നീക്കം ചെയ്തു. ഇന്നലെ വൈകീട്ടോടേ ഇന്ത്യയില്‍ ടിക് ടോക് പൂര്‍ണമായി ഓഫ് ലൈനായി.
എന്നാല്‍ നിരോധനം മറികടക്കാന്‍ പുതിയ വഴികള്‍ തേടുകയാണ് ടിക് ടോക്. ഇതിന്റെ ഭാഗമായി ഇന്ത്യയിലെ ടിക് ടോകിന്റെ നിയന്ത്രണം അയര്‍ലന്‍ഡ്, യുകെ സര്‍വറുകളിലേക്ക് മാറ്റിയിരുന്നു. പ്ലേസ്റ്റോറില്‍ നിന്നും ആപ്പ് സ്റ്റോറില്‍ നിന്നും മാറ്റിയതിനാല്‍ പുതുതായി ഡൌണ്‍ലോഡ് ചെയ്യാന്‍ കഴിയില്ല. ഇന്നലെ രാവിലെ നിലവില്‍ ടിക് ടോക് ഉപയോഗിക്കുന്നവര്‍ക്ക് തുടര്‍ന്നും ഉപയോഗിക്കാന്‍ സാധിച്ചിരുന്നു. പുതിയ വിഡിയോ അപ്‌ലോഡ് ചെയ്യണമെങ്കില്‍ ടിക് ടോകിന്റെ പുതുക്കിയ ടേംസ് ആന്‍ഡ് കണ്ടീഷന്‍സ് അംഗീകരിച്ചാല്‍ മതിയായിരുന്നു.
എന്നാല്‍ വൈകീട്ടോടെ രാജ്യത്ത് ആപ്പിന്റെ പ്രവര്‍ത്തനം പൂര്‍ണമായി നിര്‍ത്തിവച്ചതായാണ് റിപ്പോര്‍ട്ട്. ഫോണില്‍ ടിക് ടോക്ക് ഒപ്പണ്‍ ചെയ്യുമ്പോള്‍ തങ്ങള്‍ ഗവര്‍ണ്‍മെന്റിന്റെ നിരോധനം പാലിക്കുന്നു എന്ന സന്ദേശമാണ് കാണാന്‍ സാധിക്കുന്നത്. ചിലര്‍ക്ക് നെറ്റ് വര്‍ക്ക് ഇഷ്യൂ എന്ന സന്ദേശം ലഭിക്കുന്നുണ്ട്.
ഇന്ത്യന്‍ ഉപയോക്താക്കളുടെ ഒരു വിവരങ്ങളും ചൈന ഉള്‍പ്പെടെയുള്ള വിദേശ സര്‍ക്കാരുകളുമായി പങ്കുവച്ചിട്ടില്ലെന്ന് ടിക് ടോക് ഇന്ത്യ മേധാവി നിഖില്‍ ഗാന്ധി വ്യക്തമാക്കി.