തിരുവനന്തപുരം: കുഴമ്പുരൂപത്തിലാക്കി കടത്താന്‍ ശ്രമിച്ച ഒന്നരകിലോ സ്വര്‍ണം തിരുവനന്തപുരം അന്താരാഷ്ട്ര വിമാനത്താവളത്തില്‍ പിടികൂടി. കഴിഞ്ഞ ദിവസം പുലര്‍ച്ചെ ദുബൈയില്‍ നിന്ന് വന്ന ഐ-എക്‌സ് 540 എയര്‍ ഇന്ത്യാ എക്‌സ്പ്രസ് വിമാനത്തിലെ യാത്രക്കാരനായ കൊല്ലം സ്വദേശി അബ്ദുള്‍ വഹാബില്‍ നിന്നാണ് 40 ലക്ഷം രൂപ വിലവരുന്ന സ്വര്‍ണം എയര്‍ കസ്റ്റംസ് പ്രിവന്റീവ് വിഭാഗം പിടികൂടിയത്. സ്വര്‍ണം കുഴമ്പു രൂപത്തിലാക്കി പ്ലാസ്റ്റിക്ക് കവറിനുളളില്‍ വച്ച് നടുവേദനക്കുപയോഗിക്കാവുന്ന ബെല്‍റ്റിനകത്താക്കിയാണ് കടത്താന്‍ ശ്രമിച്ചത്. ബെല്‍റ്റ് അരയില്‍ കെട്ടിയിരുന്നു. അതിനുമുകളില്‍ അടിവസ്ത്രമിട്ട് അതിനുമേല്‍ കട്ടിയുളള ജീന്‍സ് ധരിച്ചിരുന്നു. എക്‌സറേ പരിശോധനയിലോ സ്‌കാനിങിലോ സ്വര്‍ണം കണ്ടെത്താന്‍ കഴിഞ്ഞിരുന്നില്ല. രഹസ്യ വിവരത്തെ തുടര്‍ന്ന് കസ്റ്റംസ് നടത്തിയ ദേഹ പരിശോധനയിലാണ് സ്വര്‍ണം കണ്ടെത്തിയത്.