കണ്ണൂര്‍: വിദ്യാഭ്യാസത്തിലൂടെ പഠനപുരോഗതിക്കു പുറമേ മനുഷ്യത്വവും സാംസ്‌കാരിക വളര്‍ച്ചയും നേടിയെടുക്കണമെന്നു സാഹിത്യകാരന്‍ എം. മുകുന്ദന്‍. സാംസ്‌കാരിക വളര്‍ച്ചയ്ക്കുതകുന്ന രീതിയിലേക്ക് പാഠപുസ്തകങ്ങളും മാറണമെന്നു അദ്ദേഹം പറഞ്ഞു.
കേരള ഭാഷാ ഇന്‍സ്റ്റിറ്റ്യൂട്ട് സംഘടിപ്പിച്ച ഡോ. കെ.പി ഗോപിനാഥിന്റെ പുസ്തക പ്രകാശനം നിര്‍വഹിക്കുകയായിരുന്നു അദ്ദേഹം. ആദ്യകാലത്ത് ജീവിച്ചിരുന്നവര്‍ക്കു മനുഷ്യത്വം ഉണ്ടായിരുന്നു. അത് കുറഞ്ഞുവരികയാണിപ്പോള്‍.
കേരളീയ സങ്കല്‍പപ്രകാരം പശു സാധു മൃഗമായിരുന്നു എന്നാണു കരുതിയിരുന്നതെങ്കിലും പശുവെന്നു കേള്‍ക്കുമ്പോള്‍ തന്നെ ഭയക്കേണ്ടി വരുന്നെന്നും മുകുന്ദന്‍ പറഞ്ഞു.
പ്രൊഫ. കാര്‍ത്തികേയന്‍ നായര്‍ അധ്യക്ഷനായി. കരിക്കുലം കമ്മിറ്റി അംഗം കെ. പ്രഭാകരന്‍ പുസ്തകം ഏറ്റുവാങ്ങി.
ഡോ. എം. ബാലന്‍, പി.യു രമേശന്‍, ഡിവൈ.എസ്.പി പി.പി സദാനന്ദന്‍, ഡോ. വിജയന്‍ ചാലോട്, വിനോയ് തോമസ്, ഡോ. കെ. പ്രമോദ് സംസാരിച്ചു.