തിരുവനന്തപുരം: ദേശാഭിമാനിയുടെ എഡിറ്റോറിയലിലെ 'പപ്പു' പ്രയോഗത്തിനെതിരേ സി.പി.ഐ സംസ്ഥാന സെക്രട്ടറി കാനം രജേന്ദ്രന്‍. രാഹുല്‍ ഗാന്ധിയെ വിമര്‍ശിക്കുമ്പോള്‍ അസഹിഷ്ണുത വേണ്ടെന്നും ഭാഷ അതു പ്രയോഗിക്കുന്നവര്‍ തന്നെ തീരുമാനിക്കണമെന്നും കേസരി സ്മാരക ട്രസ്റ്റ് സംഘടിപ്പിച്ച ഇന്ത്യന്‍ വോട്ട് വര്‍ത്തമാനങ്ങള്‍ എന്ന മുഖാമുഖം പരിപാടിയില്‍ കാനം പറഞ്ഞു.

എന്നാല്‍ ഇടതുപക്ഷത്തിനെതിരേ രാഹുല്‍ ഗാന്ധിയും യു.ഡി.എഫും ഇപ്പോള്‍ നടത്തുന്ന പ്രചാരണങ്ങള്‍ മതേതര ശക്തികളെ സഹായിക്കാനുള്ളതല്ല. തമിഴ്‌നാട്ടില്‍ സി.പി.ഐക്കും സി.പി.എമ്മിനും വേണ്ടി പ്രചാരണം നടത്തുന്ന രാഹുല്‍ കേരളത്തില്‍ ഇടതുപക്ഷത്തിനെതിരേ നടത്തുന്ന പ്രചാരണം ശരിയെന്നും രാഹുലിനെതിരേ ഇടതുപക്ഷ ജനാധിപത്യ മുന്നണി നടത്തുന്ന പ്രചാരണം തെറ്റെന്നും വ്യാഖ്യാനിക്കുന്നത് അര്‍ഥശൂന്യമാണ്. കോഴിക്കോട്ടെ യു.ഡി.എഫ് സ്ഥാനാര്‍ഥി കോഴവാങ്ങിയെന്ന ടി.വി ചാനലിന്റെ ആരോപണം തെരഞ്ഞെടുപ്പ് കമ്മിഷന്‍ അന്വേഷിച്ച് നടപടിയെടുക്കട്ടെ എന്ന് ചോദ്യത്തിനു മറുപടിയായി അദ്ദേഹം പറഞ്ഞു. രാഷ്ട്രീയ നേതാക്കള്‍ പരാമര്‍ശം നടത്തുമ്പോള്‍ ശ്രദ്ധിക്കേണ്ടതുണ്ട്. വിശ്വാസത്തിന്റെ പേരുപറഞ്ഞ് വോട്ട് നേടാന്‍ ശ്രമിക്കുന്ന മുന്നണിയല്ല ഇടതുമുന്നണിയെന്നും പറഞ്ഞു.