പയ്യോളി: കാരുണ്യത്തിന്റെ ഉറവ വറ്റാതെ ചെരണ്ടത്തൂര്‍ എം.എച്ച്.ഇ.എസ്.കോളജ് എന്‍.എസ്.എസ് യൂനിറ്റ് നാലാമത് വീടും പൂര്‍ത്തിയാക്കി നല്‍കി. എളമ്പിലാട് വാപ്പുറത്ത് ജാനുവിനും മാനസിക വൈകല്യമുള്ള മകള്‍ക്കുമാണ് വീട് നിര്‍മിച്ച് നല്‍കിയത്. കാലിക്കറ്റ് യൂനിവേഴ്‌സിറ്റി അഭയം സ്‌നേഹഭവനം പദ്ധതിയുടെ ഭാഗമായി ഏറ്റവും കൂടുതല്‍ വീടുകള്‍ നിര്‍മിച്ച് നല്‍കിയതും ഈ യൂനിറ്റാണ്. കഠിന പ്രയത്‌നത്തിന്റെ ഭാഗമായാണ് ഒരു വര്‍ഷത്തിനുള്ളില്‍ നാല് വീടുകളുടെ താക്കോല്‍ദാനം നിര്‍വഹിക്കാന്‍ സാധിച്ചത്.
നാല് വീടുകള്‍ക്ക് ഏകദേശം 20 ലക്ഷത്തോളം രൂപ ചെലവ് വന്നിട്ടുണ്ട്. ഇത് പൂര്‍ണ്ണമായും എന്‍.എസ്.എസ് വളണ്ടിയര്‍മാര്‍ വിദ്യാര്‍ഥികളും അധ്യാപകരും പൊതുജനങ്ങളും മാനേജ്‌മെന്റും സമാഹരിച്ചതാണ്. ജാനു അമ്മക്ക് നിര്‍മിച്ച വീടിന്റെ താക്കോല്‍ദാന കര്‍മ്മം കോളജ് പ്രിന്‍സിപ്പല്‍ വി.എം സുകേഷ് നിര്‍വഹിച്ചു.
എം.കെ രോഹിത്, പി.കെ വിജയന്‍, അര്‍ച്ചന, ജുനൈദ്, അനില്‍കുമാര്‍, ജാബിര്‍ സംസാരിച്ചു.