ജിദ്ദ: സഊദി അറേബ്യയിലെ ബുറൈദയില്‍ പൊലിസ് ചെക്ക്‌പോയിന്റിലുണ്ടായ വെടിവയ്പില്‍ നാലു പേര്‍ മരിച്ചു. സുരക്ഷാ ഉദ്യോഗസ്ഥന്‍, രണ്ടു ഭീകരര്‍, ബംഗ്ലാദേശ് പൗരന്‍ എന്നിവരാണ് മരിച്ചതെന്ന് അധികൃതര്‍ അറിയിച്ചു.

ഖാസിം മേഖലയിലെ ബുറൈദ തര്‍ഫിയ റോഡിലെ പൊലിസ് ചെക്‌പോയിന്റിലേക്ക് വാഹനത്തില്‍ ഇരച്ചെത്തിയ അക്രമികള്‍ വെടിയുതിര്‍ക്കുകയായിരുന്നു. ഇതോടെ പൊലിസ് തിരിച്ചും വെടിയുതിര്‍ക്കുകയായിരുന്നു. സുരക്ഷാ ഉദ്യോഗസ്ഥനായ സുലൈമാന്‍ അബ്ദുല്‍ അസീസ് അബ്ദുല്‍ ലത്തീഫ് ആണ് കൊല്ലപ്പെട്ടതെന്ന് ആഭ്യന്തര മന്ത്രാലയം അറിയിച്ചു. കൊല്ലപ്പെട്ട ബംഗ്ലാദേശുകാരന്റെ പേര് പുറത്തുവിട്ടിട്ടില്ല.
സംഭവത്തെ കുറിച്ച് വിശദമായ അന്വേഷണം ആരംഭിച്ചു. വെടിവയ്പ്പുണ്ടായ പശ്ചാത്തലത്തില്‍ മേഖലയില്‍ ഭീതി പരന്നിരിക്കുകയാണ്. സ്ഥലത്ത് പൊലിസ് സുരക്ഷ ശക്തമാക്കി.
മൂന്ന് പേരാണ് അക്രമിസംഘത്തിലുണ്ടായിരുന്നത്. ആയുധങ്ങള്‍ നിറച്ച വാഹനത്തിലാണ് അക്രമികള്‍ എത്തിയത്. ചെക്‌പോയന്റിലെത്തിയ ഉടനെ വെടിയുര്‍ത്തിക്കുകയായിരുന്നു. അക്രമി സംഘത്തിലെ ഒരാളെ പൊലിസ് പിടികൂടി. ഇയാള്‍ക്ക് വെടിയേറ്റിട്ടുണ്ട്.
സംഭവം അന്വേഷിക്കുന്നതിന് വന്‍ സംഘത്തെ സര്‍ക്കാര്‍ നിയോഗിച്ചിട്ടുണ്ട്. മേഖലയില്‍ വ്യാപക റെയ്ഡ് നടക്കുകയാണ്. ഏപ്രിലിലും സമാനമായ ആക്രമമുണ്ടായിരുന്നു.തെക്ക് പടിഞ്ഞാറന്‍ പ്രവിശ്യയായ അസീറില്‍ ഏപ്രില്‍ 20നുണ്ടായ ആക്രമണത്തില്‍ നാല് പൊലിസുകാരാണ് കൊല്ലപ്പെട്ടത്.
നാല് പേര്‍ക്ക് ഗുരുതരമായി പരിക്കേല്‍ക്കുകയും ചെയ്തിരുന്നു. അല്‍ഖാഇദയോ ഐസിസോ ആണ് അക്രമത്തിന് പിന്നിലെന്ന് കരുതുന്നു.