എടപ്പാള്‍: മദ്യനിരോധനം ഏര്‍പ്പെടുത്തിയാല്‍ സംസ്ഥാന വരുമാനത്തില്‍ കുറവ് വരുമെന്ന ധാരണ തെറ്റാണെന്ന് ബീഹാര്‍ മുഖ്യമന്ത്രിയുടെ വാക്കുകള്‍ വ്യക്തമാക്കുന്നതായും സമ്പൂര്‍ണ മദ്യനിരോധനം നടപ്പിലാക്കാന്‍ സര്‍ക്കാര്‍ തയാറകണമെന്നും അതിനായി ബഹുജന മുന്നേറ്റം രൂപപ്പെടണമെന്നും അബ്ദുള്‍ വഹാബ് എം.പി അഭിപ്രായപ്പെട്ടു.
കുറ്റിപ്പാലയില്‍ ബിവറേജസ് ഔട്ട്‌ലറ്റ് ആരംഭിക്കാനുള്ള നീക്കത്തിനെതിരേ നടക്കുന്ന ജനകീയ പ്രക്ഷോഭത്തിന് പിന്തുണയുമായി എത്തിയതായിരുന്നു അദേഹം. സമരത്തിന്റെ ഭാഗമായി സമരസമിതിയുടെ നേതൃത്വത്തില്‍ കഞ്ഞിവച്ച് സമരം നടത്തി. ജനങ്ങള്‍ക്ക് ഭീഷണിയാകുന്ന ഔട്ട്‌ലറ്റ് സ്ഥാപിക്കരുതെന്നാവശ്യപെട്ടും സമരമിരിക്കുന്ന നാട്ടുകാര്‍ക്ക് അഭിവാദ്യമര്‍പ്പിച്ചും മദറസാ വിദ്യാര്‍ഥികള്‍ സമരപന്തലിലേക്ക് മാര്‍ച്ച് നടത്തി. മുനവുറല്‍ ഇസ്‌ലാം മദ്‌റസയിലെ വിദ്യാര്‍ഥികളാണ് പ്രകടനം നടത്തിയത്. കുറ്റിപ്പാലയില്‍ ബിവറേജസ് ഔട്ട്‌ലറ്റ് സ്ഥാപിക്കാനുവദിക്കില്ലെന്ന ഉറച്ച നിലപാടിലാണ് നാട്ടുകാര്‍. സമരസമിതി ചെയര്‍മാന്‍ എം മുസ്തഫ അധ്യക്ഷനായി. പത്തില്‍ അഷറഫ്, എം.എ നജീബ്, എം.എ നവാബ്, ഭാസ്‌കരന്‍ വട്ടംകുളം, കഴങ്കില്‍ മജീദ്, സിദ്ദീഖ്, പഞ്ചായത്തംഗം അനിത സംസാരിച്ചു.