ഹൈദരാബാദ്: ഐ.പി.എല്ലിലെ 19ാം മത്സരത്തില്‍ സണ്‍റൈസേഴ്‌സ് ഹൈദരാബാദിനെ മുംബൈ പിടിച്ചുകെട്ടി. 40 റണ്‍സിനാണ് മുംബൈ ഹൈദരാബാദിനെ തോല്‍പ്പിച്ചത്. ലസിത് മലിങ്കക്ക് പകരമെത്തിയ വിന്‍ഡീസ് പേസര്‍ അല്‍സാറി ജോസഫിന്റെ ആറ് വിക്കറ്റ് നേട്ടമാണ് ഹൈദരാബാദിന്റെ മുനയൊടിച്ചത്. 3.4 ഓവറില്‍ 12 റണ്‍സ് വഴങ്ങി ആറ് വിക്കറ്റ് നേടിയ ജോസഫിന്റേത് ഐ.പി.എല്ലിലെ ഏറ്റവും മികച്ച ബോളിങ് റെക്കോര്‍ഡാണ്.

ആദ്യം ബാറ്റ് ചെയ്ത മുംബൈ കീറണ്‍ പൊള്ളാര്‍ഡിന്റെ (26 പന്തില്‍ 46) ബാറ്റിങ് മികവില്‍ 20 ഓവറില്‍ ഏഴ് വിക്കറ്റ് നഷ്ടത്തില്‍ 136 റണ്‍സെടുത്തു. മറുപടി ബാറ്റിങ്ങിനിറങ്ങിയ ഹൈദരാബാദിന് ഓപ്പണര്‍മാരായ വാര്‍ണര്‍(15), ബെയര്‍‌സ്റ്റോ(16) എന്നിവരെ ആദ്യ ഓവറുകളില്‍ തന്നെ മുംബൈ പുറത്താക്കിയിരുന്നു. ഇവരെ കൂടാതെ മനീഷ് പാണ്ഡെ(16), ദീപക് ഹൂഡ(20), മുഹമ്മദ് നബി എന്നിവര്‍ മാത്രമാണ് ഹൈദരാബാദിനായി രണ്ടക്കം കടന്നവര്‍. ഒടുവില്‍ 17.4 ഓവറില്‍ 96 റണ്‍സിന് ഹൈദരാബാദ് മുംബൈക്ക് കീഴടങ്ങുകയായിരുന്നു.
മുംബൈക്ക് വേണ്ടി ഡീ കോക്ക്(19), ഇഷാന്‍ കിഷന്‍(17), ഹര്‍ദിക് പാണ്ഡ്യ(14), രോഹിത് ശര്‍മ(11), രാഹുല്‍ ചഹര്‍(10) എന്നിവരും രണ്ടക്കം കടത്തി. ഹൈദരാബാദിന് വേണ്ടി സിദ്ധാര്‍ഥ് കൗള്‍ രണ്ട് വിക്കറ്റ് നേടി.