എരുമപ്പെട്ടി: മൈക്രോ ഫിനാന്‍സിന്റെ പേരില്‍ ജില്ലയിലെ വനിത സംഘങ്ങളെ കബളിപ്പിച്ച് ലക്ഷങ്ങള്‍ തട്ടിയെടുത്ത കേസില്‍ കസ്റ്റഡിയിലെടുത്ത പ്രതികളെ എരുമപ്പെട്ടി പൊലിസ് അറസ്റ്റ് ചെയ്യാതെ വിട്ടയച്ചത് പ്രതിഷേധങ്ങള്‍ക്കിടയാക്കുന്നു.
പൊലിസ് പ്രതികളെ സംരക്ഷിക്കുന്ന നടപടിയാണ് സ്വീകരിക്കുന്നതെന്നാരോപിച്ച് തട്ടിപ്പിനിരയായ സ്ത്രീകള്‍ ജില്ലാ കലക്ടര്‍ക്കും സിറ്റി പൊലിസ് കമ്മിഷ്ണര്‍ക്കും പരാതി നല്‍കി.
വേലൂര്‍ പോസ്റ്റ് ഓഫിസ് സെന്ററിന് സമീപം താമസിക്കുന്ന സുജിത, പേരാമംഗലം സ്വദേശി പ്രശാന്ത് എന്നിവര്‍ക്കെതിരേയാണ് സാമ്പത്തിക വഞ്ചന കുറ്റത്തിന് പൊലിസ് കേസെടുത്തിരിക്കുന്നത്. ഇവരെ കസ്റ്റഡിയിലെടുത്തെങ്കിലും മതിയായ തെളിവില്ലെന്ന കാരണത്താല്‍ പൊലിസ് പ്രതികളുടെ അറസ്റ്റ് രേഖപ്പെടുത്താതെ സ്റ്റേഷനില്‍ നിന്നും പറഞ്ഞ് വിടുകയായിരുന്നു.
പ്രമുഖ ബിസിനസ് ഗ്രൂപ്പിന്റെ പേരില്‍ വായ്പ നല്‍കാമെന്ന് വാഗ്ദാനം നല്‍കി ജില്ലയിലെ വിവിധ പ്രദേശങ്ങളില്‍ വനിതാ സംഘങ്ങള്‍ രൂപീകരിച്ചാണ് പ്രതികള്‍ തട്ടിപ്പ് നടത്തിയത്.
ഒന്നര ലക്ഷം രൂപ വായ്പയായി നല്‍കാമെന്ന് അറിയിച്ച് രേഖകള്‍ തയ്യാറാക്കുന്നതിനായി അംഗങ്ങളില്‍ നിന്ന് 5000 രൂപ വീതം വാങ്ങി കബളിപ്പിക്കുകയായിരുന്നു.
തട്ടിപ്പ് തിരിച്ചറിഞ്ഞ വനിതകള്‍ കഴിഞ്ഞ ദിവസം കൂട്ടമായെത്തി എരുമപ്പെട്ടി പൊലിസില്‍ പരാതി നല്‍കി.
എന്നാല്‍ പ്രതികളെ കസ്റ്റഡിയിലെടുത്ത പൊലിസ് കേസെടുത്തതിന് ശേഷം പ്രതികളെ സ്റ്റേഷനില്‍ നിന്നും വിടുകയാണുണ്ടായത്. പരാതി നല്‍കിയ സമയം മുതല്‍ പ്രതികളെ സംരക്ഷിക്കുന്ന നിലപാടാണ് പൊലിസ് സ്വീകരിച്ചിരുന്നതെന്ന് ആക്ഷേപമുണ്ട്.
കേസെടുക്കുവാന്‍ ആദ്യം തയ്യാറാകാതിരുന്ന പൊലിസ് പരാതിക്കാരുടെ ശക്തമായ പ്രതിഷേധത്തെ തുടര്‍ന്നാണ് കേസെടുത്തത്.
പ്രതികളെ അറസ്റ്റ് ചെയ്യുമെന്ന് ഉറപ്പ് നല്‍കിയ പൊലിസ് പരാതിക്കാര്‍ പിരിഞ്ഞ് പോയതിന് ശേഷം പ്രതികളെ വിട്ടയയക്കുകയായിരുന്നു.
പണത്തിന് പുറമെ വായ്പക്ക് നല്‍കാനെന്ന വ്യാജേന പരാതിക്കാരുടെ പേരില്‍ മുദ്രപേപ്പറുകളും ,ബ്ലാങ്ക് ചെക്കുകളും ,നികുതി കടലാസും പ്രതികള്‍ കൈക്കലാക്കിയിട്ടുണ്ട്.
എന്നാല്‍ രേഖകള്‍ പിടിച്ചെടുക്കാന്‍ പ്രതികളുടെ വീടുകളില്‍ പൊലിസ് പരിശോധന നടത്താന്‍ തയ്യാറായില്ലെന്നും ആക്ഷേപമുണ്ട്.
അന്വേഷണം നടത്തി പ്രതികളെ അറസ്റ്റ് ചെയ്യാനും പ്രതികളുടെ വീടുകളില്‍ റെയ്ഡ് നടത്താനും കലക്ടറും, പൊലിസ് കമ്മിഷ്ണറും കുന്നംകുളം അസി.കമ്മിഷ്ണര്‍ക്ക് ഉത്തരവ് നല്‍കിയിട്ടുണ്ട്.