കോട്ടയം: കേരളത്തിന് മികച്ച ക്ഷീരോല്‍പാദക സംസ്ഥാനത്തിനുള്ള ഇന്ത്യാ ടുഡേ ഗ്രൂപ്പിന്റെ ദേശീയ പുരസ്‌കാരം ലഭിച്ചു. പാലുല്‍പാദനത്തില്‍ 17 ശതമാനം വര്‍ധനവും ക്ഷീരമേഖലയില്‍ വിവിധങ്ങളായ നൂതനപദ്ധതികളും ആവിഷ്‌കരിച്ചു നടപ്പിലാക്കിയത് പരിഗണിച്ചാണ് പുരസ്‌കാരം ലഭിച്ചത്. 

കേരളത്തെ പുരസ്‌കാരത്തിന് അര്‍ഹനാക്കിയ വനം-വന്യജീവി മൃഗസംരക്ഷണ- ക്ഷീരവികസന വകുപ്പ് മന്ത്രി അഡ്വ. കെ.രാജുവിന് കോട്ടയം ജില്ലയിലെ ക്ഷീര കര്‍ഷകരുടേയും ക്ഷീരസംഘങ്ങളുടെയും നേതൃത്വത്തില്‍ ഇന്ന് ഉച്ചയ്ക്ക് 3.30ന് ജില്ലാപഞ്ചായത്ത് ഹാളില്‍വച്ച് സ്വീകരണം നല്‍കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. തിരുവഞ്ചൂര്‍ രാധാകൃഷ്ണന്‍ എം.എല്‍.എ അധ്യക്ഷനാകുന്ന സ്വീകരണ സമ്മേളനം ഭക്ഷ്യ സിവില്‍ സപ്ലൈസ് വകുപ്പ് മന്ത്രി പി.തിലോത്തമന്‍ ഉദ്ഘാടനം ചെയ്യും. വാര്‍ത്താ സമ്മേളനത്തില്‍ കണ്‍വീനര്‍ അറയ്ക്കല്‍ സുന്ദരന്‍, സി.കെ രാജേഷ്, കെ. രമേശന്‍, അനൂപ് കുമാര്‍, ഹേമ ആര്‍ നായര്‍ എന്നിവര്‍ പങ്കെടുത്തു.