അന്തിക്കാട്: കോവിലകം കോള്‍പാടത്ത് താമരക്കൃഷിയുടെ വിജയഗാഥ വിരിയുന്നു. നെല്‍ കൃഷിക്ക് അനുയോജ്യമല്ലാത്ത കോള്‍ പാടങ്ങളില്‍ താമരകൃഷിയില്‍ നൂറു മേനി വിളയിക്കുകയാണ് കര്‍ഷകര്‍. ജില്ലയിലെ വലിയ കോള്‍ പടവുകളില്‍ ഒന്നായ അന്തിക്കാട് പാടശേഖരത്തിലെ കോവിലകംപാടം, ആലപ്പാട് പടവ് ,ചാഴൂര്‍ പടവ് ,പുള്ള് പുറത്തൂര്‍ കോള്‍പടവ് എന്നിവിടങ്ങളിലെല്ലാം ഏക്കര്‍ കണക്കിന് നിലങ്ങളില്‍ നിലവില്‍ താമര കൃഷി ചെയ്യുന്നുണ്ട്.
കോവിലകം പാടത്തുനിന്ന് മാത്രം ദിവസവും 300, 350 പൂക്കള്‍ വരെ പറിച്ചെടുക്കുന്നുണ്ട്. ദൂരെ സ്ഥലങ്ങളിലേക്ക് മൊട്ടുകളായാണ് കൊണ്ടു പോകുന്നത്. കൂടല്‍മാണിക്യം, ഗുരുവായുര്‍ തുടങ്ങിയ ക്ഷേത്രങ്ങളിലേക്കും ഈ പാടത്തു നിന്ന് കൊണ്ടു പോകുന്നുണ്ട്.
ഒരു പൂവിന് രണ്ട് രൂപയാണ് വില. പൊതുവിപണിയില്‍ അഞ്ചു രൂപ വില ഈടാക്കുന്നുണ്ട്. നവരാത്രി, ശബരിമല സീസണുകളിലാണ് പൂവിന് ആവശ്യക്കാര്‍ ഏറുന്നത്. കൃഷിക്ക് വേണ്ടി വരുന്ന ചെലവുമായി നോക്കിയാല്‍ വില തുച്ഛമാണെന്നാണ് കര്‍ഷകര്‍ പറയുന്നത്.
പാടത്ത് പുല്ലു കയറി മൂടാതെ നോക്കുക എന്നതാണ് പ്രധാന ജോലി. മൊട്ടുകള്‍ തിന്നു നശിപ്പിക്കുന്ന എലികളും നീലക്കോഴികളുമാണ് വലിയ ശല്യം. നീലക്കോഴികള്‍ പാടത്ത് ഇറങ്ങാതിരിക്കാന്‍ മുകളില്‍ വലവിരിച്ചിട്ടുണ്ട്. കപ്പലണ്ടിപ്പിണ്ണാക്ക്, ചാണകം എന്നിവയാണ് വളം.
പിണ്ണാക്കിന് വില കുതിച്ചുയരുന്നതും ചാണകം ആവശ്യത്തിനു കിട്ടാത്തതും കര്‍ഷകരെ പ്രതിസന്ധിയിലാക്കുന്നുണ്ട്. ഈ വര്‍ഷത്തെ കനത്ത ചൂടില്‍ മേഖലയില്‍ വ്യാപകമായി താമരച്ചെടികള്‍ കരിഞ്ഞുണങ്ങിയതും കര്‍ഷകര്‍ക്ക് തിരിച്ചടിയായി.