ജിദ്ദ: ഹജ്ജ് തീര്‍ഥാടകര്‍ക്കുള്ള സേവനങ്ങള്‍ വിപുലീകരിക്കുമെന്ന് ഹജ്ജ് ഉംറ മന്ത്രാലയ വൃത്തങ്ങള്‍ അറിയിച്ചു. പ്രവേശന നടപടികള്‍ അതാത് രാജ്യങ്ങളിലെ വിമാനത്താവളങ്ങളില്‍ തന്നെ പൂര്‍ത്തിയാക്കുന്ന പദ്ധതി വിപുലീകരിക്കുന്നതിനെ കുറിച്ചാണ് ആലോചിക്കുന്നത്. സഊദി ആഭ്യന്തര മന്ത്രിയുടെ മേല്‍നോട്ടത്തില്‍ പാസ്‌പോര്‍ട്ട് മേധാവിക്ക്വകീഴില്‍ ഇതിനുള്ള നടപടികള്‍ പുരോഗമിക്കുകയാണ്. മുന്നോടിയായി പദ്ധതി നടപ്പാക്കാന്‍ ഉദ്ദേശിക്കുന്ന രാജ്യങ്ങള്‍ പ്രത്യേക സമിതി സന്ദര്‍ശിച്ച് ആവശ്യമായ ഒരുക്കങ്ങള്‍ സംബന്ധിച്ച് പഠിക്കും. തീര്‍ഥാടകര്‍ക്കുള്ള സേവനം മെച്ചപ്പെടുത്താന്‍ സല്‍മാന്‍ രാജാവിനും കിരീടാവകാശി അമീര്‍ മുഹമ്മദ് ബിന്‍ സല്‍മാനും നിര്‍ദേശിച്ചത് അനുസരിച്ചാണിത്. യാത്രാനടപടികള്‍ എളുപ്പമാക്കുക എന്ന ലക്ഷ്യത്തോടെ ജവാസാത്ത് വിഭാഗം കഴിഞ്ഞ വര്‍ഷമാണ് ഈ പദ്ധതി ആരംഭിച്ചത്.

ഇന്തോനേഷ്യ, മലേഷ്യ എന്നിവിടങ്ങളിലെ വിമാനത്താവളങ്ങളിലാണ് പരീക്ഷണാര്‍ഥത്തില്‍ നടപ്പാക്കി തുടങ്ങിയത്. ഇന്ത്യ, പാകിസ്താന്‍, ബംഗ്ലാദേശ്, തുനീഷ്യ എന്നീ രാജ്യങ്ങളിലേക്ക് കൂടി ഈ പദ്ധതി വ്യാപിപ്പിക്കുമെന്നാണ് റിപ്പോര്‍ട്ടുകള്‍. ഇതോടെ ഈ രാജ്യങ്ങളില്‍ നിന്നെത്തുന്ന തീര്‍ഥാടകര്‍ക്ക് അതാത് രാജ്യങ്ങളില്‍ നിന്ന് യാത്രാ നടപടികള്‍ പൂര്‍ത്തിയാക്കാന്‍ സാധിക്കും. ജിദ്ദ, മദീന വിമാനത്താവളത്തിലെ തിരക്ക് കുറക്കാനും തീര്‍ഥാടകരെ വേഗത്തില്‍ താമസ കേന്ദ്രങ്ങളിലെത്താനും ഇത് മൂലം സാധിക്കും. മലേഷ്യ, ഇന്തോനേഷ്യ എന്നിവിടങ്ങളിലെ പദ്ധതി പ്രവര്‍ത്തനം സമിതി പരിശോധിക്കുമെന്ന് ഹജ്ജ് ഉംറ മന്ത്രാലാലയം ട്വീറ്ററിലൂടെ വ്യക്തമാക്കി. 'ത്വരീഖ് മക്ക' ദൗത്യം എന്നാണ് പദ്ധതിയുടെ പേര്. പാകിസ്താന്‍, ബംഗ്ലാദേശ്, ഇന്ത്യ, തുനീഷ്യ എന്നീ രാജ്യങ്ങളില്‍ നടപ്പാക്കുന്നത് സംബന്ധിച്ചുള്ള സാധ്യതകള്‍ സമിതി പഠന വിധേയമാക്കും.

ഹറമിലെ സ്‌ക്രീനുകളില്‍ ഇനി അറബി ഇതര ഭാഷകളും

ജിദ്ദ: ഹറമിലെ സ്‌ക്രീനുകളില്‍ ഇനി മുതല്‍ അറബി ഭാഷയിലുള്ള സന്ദേശങ്ങള്‍ക്ക് പുറമെ മറ്റ് ഭാഷകളിലുള്ള സന്ദേശങ്ങളും തെളിയും. ഇംഗ്ലീഷ്, ഫ്രഞ്ച്, ഉര്‍ദു, മാലി, പേര്‍ഷ്യന്‍ ഭാഷകളിലുള്ള സന്ദേശങ്ങളാണ് കൂടുതലായി ഉള്‍പ്പെടുത്തിയിട്ടുള്ളത്. തീര്‍ഥാടകര്‍ക്കും സന്ദര്‍ശകര്‍ക്കും മാര്‍ഗ നിര്‍ദേശങ്ങള്‍ നല്‍കാനാണ് സ്‌ക്രീനില്‍ സന്ദേശങ്ങള്‍ കൊടുക്കാറുള്ളത്. വ്യത്യസ്ത രാജ്യങ്ങളില്‍ നിന്നും തീര്‍ഥാടനത്തിനെത്തുന്നവര്‍ക്ക് ഉപകാരപ്പെടുന്ന രീതിയിലാണ് വിശുദ്ധ ഹറമിലെ സ്‌ക്രീനുകളിലെ സന്ദേശങ്ങള്‍ പരിഭാഷപ്പെടുത്തിയിട്ടുള്ളത്. നേരത്തെ ഇത് അറബി ഭാഷയില്‍ മാത്രമായിരുന്നു.

വിവിധ ഭാഷകളിലുള്ള മാര്‍ഗനിര്‍ദേശങ്ങള്‍ വിദേശ തീര്‍ഥാടകര്‍ക്ക് ഏറെ സഹായകമാകുമെന്ന് ഹറമിലെ ഭാഷാ, വിവര്‍ത്തന വിഭാഗം മേധാവി അഹമ്മദ് അല്‍ഹുമൈദി പറഞ്ഞു. കിംഗ് അബ്ദുല്‍ അസീസ് ഗെയ്റ്റ്, കിംഗ് ഫഹദ് എസ്‌കലേറ്റര്‍ എന്നിവക്കു സമീപമുള്ള സ്‌ക്രീനുകളിലെ ബോവല്‍ക്കരണ, മാര്‍ഗനിര്‍ദേശ ഉള്ളടക്കങ്ങളാണ് അഞ്ചു ഭാഷകളിലേക്ക് വിവര്‍ത്തനം ചെയ്തിരിക്കുന്നത്. വെള്ളിയാഴ്ചകളില്‍ വിശുദ്ധ ഹറമില്‍ നടക്കുന്ന ജുമുഅ ഖുതുബകളും മതപഠന ക്ലാസുകളും എഫ്.എം ഫ്രീക്വന്‍സി വേവുകള്‍ വഴി നിലവില്‍ തത്സമയം വിവര്‍ത്തനം ചെയ്യുന്നുണ്ട്. വിവിധ ഭാഷകളിലാണ് വിവര്‍ത്തനം ചെയ്ത് സംപ്രേക്ഷണം ചെയ്യുന്നത്. അതോടൊപ്പം ഹജ്ജിലെ പരമപ്രധാന ചടങ്ങായ അറഫ സംഗമത്തിന്റെ മുന്നോടിയായുള്ള മസ്ജിദു നമിറയിലെ ഖുതുബയും തത്സമയം വിവര്‍ത്തനം ചെയ്യുന്നുണ്ട്.