തൊടുപുഴ: തൊടുപുഴയിലെ ജനമനസുകള്‍ കീഴടക്കി യു.ഡി.എഫ് സ്ഥാനാര്‍ഥി അഡ്വ. ഡീന്‍ കുര്യാക്കോസിന്റെ തെരഞ്ഞെടുപ്പ് പര്യടനം. പ്രവര്‍ത്തകരുടെ ആവേശപ്പെരുമഴയ്ക്കാണ് തൊടുപഴ നിയോജകമണ്ഡലം സാക്ഷ്യം വഹിച്ചത്. നൂറുകണക്കിന് പ്രവര്‍ത്തകരാണ് ഇരുചക്രവാഹനങ്ങളില്‍ പ്ലക്കാര്‍ഡുകളുമായി വിജയാരവം മുഴക്കി തങ്ങളുടെ പ്രിയപ്പെട്ട സ്ഥാനാര്‍ഥിക്ക് അകമ്പടി സേവിച്ചത്. പഞ്ചായത്തുതലങ്ങളില്‍ നടന്ന സ്വീകരണ യോഗങ്ങളില്‍ എല്ലാം പ്രവര്‍ത്തകര്‍ ഒഴുകിയെത്തി.
കനത്ത വെയിലിനെയും അവഗണിച്ചും യുവാക്കളും കുട്ടികളും, സ്ത്രീകളും അടക്കം നിരവധി ആളുകളാണ് വിവിധ കേന്ദ്രങ്ങളില്‍ എത്തിച്ചേര്‍ന്നത്. ഉച്ചയ്ക്കു ശേഷം മഴയെത്തിയെങ്കിലും ആവേശം ചോരാതെയാണ് പ്രവര്‍ത്തകര്‍ സ്ഥാനാര്‍ഥിയെ ആനയിച്ചത്.
രാവിലെ ഇടവെട്ടി പഞ്ചായത്തിലെ ആര്‍പ്പാമറ്റത്തു നിന്നായിരുന്നു പ്രചരണ പരിപാടികള്‍ക്ക് തുടക്കമിടുന്നത്. പി.ജെ ജോസഫ് എം.എല്‍.എ ഉദ്ഘാടനം ചെയ്തു. യു.ഡി.എഫ് നിയോജക മണ്ഡലം ചെയര്‍മാന്‍ പി.എന്‍ സീതി അധ്യക്ഷത വഹിച്ചു. നേതാക്കളായ ടി.എം സലിം, പ്രൊഫ. എം.ജെ ജേക്കബ്, അഡ്വ. എസ്. അശോകന്‍, റോയ്.കെ പൗലോസ്, പ്രൊഫ. കെ.ഐ ആന്റണി, മാത്യു.കെ ജോണ്‍, ജോണ്‍ നെടിയപാല, ജോസി ജേക്കബ്, ജോസഫ് ജോണ്‍, ഇന്ദു സുധാകരന്‍, ലത്തീഫ് മുഹമ്മദ്, എന്‍.ഐ ബെന്നി, ജാഫര്‍ഖാന്‍ മുഹമ്മദ്, അഡ്വ. സി.കെ ജാഫര്‍, പി.എസ് ചന്ദ്രശേഖരപിള്ള, മനോഹര്‍ നടുവിലേടത്ത്, ജിയോ മാത്യു തുടങ്ങിയവര്‍ പങ്കെടുത്തു. തുടര്‍ന്നു ഇടവെട്ടി, ആലക്കോട്, കുട്ടപ്പന്‍കവല, കല്ലാനിക്കല്‍, മുട്ടം, തോട്ടുങ്കര, വിച്ചാട്ടുകവല, പഴയമറ്റം, കരിങ്കുന്നം, കുണിഞ്ഞി, പുറപ്പുഴ, വഴിത്തല, അരിക്കുഴ, ചിറ്റൂര്‍, മണക്കാട്, കുമാരമംഗലം മേഖലകളില്‍ പര്യടനം നടത്തി. കേരളാ കോണ്‍ഗ്രസ് (എം) ചെയര്‍മാന്‍ കെ.എം മാണിയുടെ മരണ വാര്‍ത്ത എത്തിയതോടെ അനുശോചനം പ്രകടിപ്പിച്ച ് ഇന്നലെ തുടര്‍ന്നുള്ള പര്യടന പരിപാടികള്‍ നിര്‍ത്തിവെക്കുകയായിരുന്നു.