കാക്കനാട്: അമിത ശബ്ദത്തിലുള്ള എയര്‍ ഹോണുകള്‍ മുഴക്കി ജില്ലയുടെ വിവിധ ഭാഗങ്ങളിലൂടെ ചീറിപ്പാഞ്ഞ 55 വാഹനങ്ങള്‍ മോട്ടോര്‍ വാഹനവകുപ്പിന്റെ പിടിയിലായി. ശബ്ദമലിനീകരണത്തിന് കാരണമാകുന്ന എയര്‍ഹോണ്‍ ഘടിപ്പിച്ച വാഹനങ്ങളാണ് ചൊവ്വാഴ്ച നടന്ന പരിശോധനയില്‍ കുടുങ്ങിയത്. എയര്‍ഹോണിന്റെ രൂപത്തിലും ഇരുചക്ര വാഹനങ്ങളുടെ സൈലന്‍സര്‍ മാറ്റിവച്ച് ഓടിക്കുന്ന രൂപത്തിലും അമിതമായ ശബ്ദ മലിനീകരണം ഉണ്ടാക്കുന്നതായിട്ടാണ് പരിശോധനയില്‍ സംഘം കണ്ടെത്തിയത്.
'നോ ഹോണ്‍' ദിനാചരണത്തിന്റെ ഭാഗമായി മോട്ടോര്‍ വാഹനവകുപ്പ് എന്‍ഫോഴ്‌സുമെന്റ് വിഭാഗത്തിന്റെ കീഴില്‍ മൂന്ന് സ്‌ക്വാഡുകള്‍ തിരിഞ്ഞാണ് ജില്ലയുടെ വിവിധ സ്ഥലങ്ങളില്‍ പരിശോധന നടത്തിയത്. അന്യസംസ്ഥാനങ്ങളില്‍ നിന്നും വിനോദസഞ്ചരികളെ കൊണ്ടുവരുന്ന ടൂറിസ്റ്റ് ബസുകള്‍, സംസ്ഥാനത്തിന്റെ വിവിധ ഭാഗങ്ങളിലേക്ക് സര്‍വീസ് നടത്തുന്ന ടൂറിസ്റ്റ് ബസുകള്‍ എന്നിവയിലാണ് അപകടകരമാംവിധം ശബ്ദമലിനീകരണം ഉണ്ടാക്കുന്ന എയര്‍ഹോണ്‍ ഘടിപ്പിച്ചതായി കണ്ടെത്തിയത്. 70 ഡെസിബല്ലില്‍ കൂടുതലുള്ള ശബ്ദം കേള്‍വിക്കു തകരാര്‍  ഉണ്ടാക്കുമെന്നു പഠനങ്ങള്‍ ചൂണ്ടികാണിക്കുന്നുണ്ട്.
ശബ്ദം 120 ഡെസിബല്ലിനു മുകളിലാണെങ്കില്‍ താല്‍ക്കാലികമായി ചെവി കേള്‍ക്കാതെയാകും. ഉയര്‍ന്ന ഡെസിബല്‍ ശബ്ദം നിരന്തരം കേട്ടാല്‍ കേള്‍വിശക്തി പൂര്‍ണ്ണമായും നഷ്ടപ്പെടാം.
അപകടകരമായ ഈ രീതിയിലുള്ള എയര്‍ഹോണ്‍ ഘടിപ്പിച്ച 25 ബസുകള്‍, അന്യസംസ്ഥാനങ്ങളില്‍ നിന്നും ചരക്കുമായി എത്തുന്ന ലോറികള്‍ എന്നിവയും പിടിയിലായവയില്‍പെടും.നിയമലംഘന നടത്തിയ വിവിധ വാഹനങ്ങളില്‍ നിന്ന് 55000 രൂപ പിഴ ഈടാക്കി.