മതിലകം:  ഇലക്ട്രിസിറ്റി ബോര്‍ഡ് പെരിഞ്ഞനം സെക്ഷന് കീഴിലുള്ള മതിലകം, പള്ളിവളവ്, പുതിയകാവ് പ്രദേശങ്ങളില്‍ വോള്‍ട്ടേജ് ക്ഷാമം രൂക്ഷമാകുന്നതായി പരാതി. ദിവസങ്ങളായി തുടര്‍ന്നു കൊണ്ടിരിക്കുന്ന വോള്‍ട്ടേജിന്റെ കുറവ് മൂലം ഒരു ഫാന്‍ പോലും കറങ്ങാത്ത അവസ്ഥയാണെന്ന് നാട്ടുകാര്‍ ആരോപിക്കുന്നു. ബള്‍ബുകള്‍ ചെറിയ രൂപത്തില്‍ പ്രകാശിക്കുന്നുണ്ടെങ്കിലും അതുകൊണ്ട് യാതൊരു പ്രയോജനവുമുണ്ടാവാറില്ലെന്നും ഫാനുകള്‍ പ്രവര്‍ത്തിപ്പിക്കാന്‍ കഴിയാത്തതിനാല്‍ ചെറിയ കുട്ടികള്‍ക്കടക്കം ചൂടിന്റെ കാഠിന്യം കൊണ്ടും കൊതുകിന്റെ ശല്യം കൊണ്ടും സ്വസ്ഥമായി ഉറങ്ങാന്‍ പറ്റാത്ത അവസ്ഥയാണെന്നും നാട്ടുകാര്‍ പറയുന്നു. മതിലകം പള്ളിവളവില്‍ സ്ഥാപിച്ചിട്ടുള്ള ട്രാന്‍സ്‌ഫോര്‍മറില്‍ നിന്ന് വൈദ്യുതി വിതരണം ചെയ്യുന്ന വീടുകളിലാണ് ഏതാനും ദിവസമായി ശക്തമായ വോള്‍ട്ടേജ് ക്ഷാമം അനുഭവപ്പെടുന്നത്. പല തവണകളിലായി ഇതു സംബന്ധിച്ച് ഇലക്ട്രിസിറ്റി ബോര്‍ഡ് അധികൃതര്‍ക്ക് പരാതി നല്‍കിയെങ്കിലും വീടുകളിലെ സാങ്കേതിക തകരാറു മൂലമായിരിക്കും ഇത്തരത്തിലുള്ള ഒരു അവസ്ഥയുണ്ടാകുന്നതെന്ന് പറഞ്ഞ് കൈ മലര്‍ത്തുകയാണ് ഉണ്ടായതെന്നും നാട്ടുകാര്‍ കുറ്റപ്പെടുത്തു. രാത്രികാലങ്ങളില്‍ അന ുഭവിക്കുന്ന ദുരിതത്തിന് പുറമെ പകല്‍ സമയങ്ങളില്‍ പോലും അത്യാവശ്യ മെഷിനറികള്‍ ഉപയോഗിക്കാന്‍ കഴിയാറില്ലെന്നും നാട്ടുകാര്‍ കുറ്റപ്പെടുത്തുന്നു. അധികൃതരുടെ നിസംഗത ഒഴിവാക്കി മതിലകം മേഖലയിലെ വോള്‍ട്ടേജ് ക്ഷാമം പരിഹരിക്കാന്‍ ഉടന്‍ നടപടി കൈ കൊള്ളണമെന്നാണ് നാട്ടുകാരുടെ ആവശ്യം.