നരിക്കുനി:മടവൂരിലെ ജാതി മത രാഷ്ടീയത്തിനതീതമായി ചിന്തിക്കുന്നവരുടെ 'മടവൂര്‍ വാര്‍ത്തകള്‍' എന്ന പേരിലുള്ള വാട്‌സ്ആപ്പ് കൂട്ടായ്മയുടെ നേതൃത്വത്തില്‍ നടത്തുന്ന സൗജന്യ കുടിവെള്ളവിതരണത്തിന്റെ ഉദ്ഘാടനം പരനിലത്ത് ഗ്രാമപഞ്ചായത്ത് പ്രസിഡണ്ടന്റ് വി.സി ഹമീദ് മാസ്റ്റര്‍ ഉദ്ഘാടനം ചെയ്തു.
വാര്‍ഡ് മെമ്പര്‍ മജ്ഞുള അധ്യക്ഷനായ യോഗത്തില്‍ ശംസിയ മലയില്‍, വി.സി റിയാസ് ഖാന്‍, അലിയ്യി മാസ്റ്റര്‍, ശശി ചക്കാലക്കല്‍, നസ്തര്‍ എ.പി , സാബിറ മൊടയാനി, ശൈനി , അസീസ് മാസ്റ്റര്‍ ആശംസകള്‍ അര്‍പ്പിച്ചു. ഗ്രൂപ്പ് അഡ്മിന്‍ ഷാഹുല്‍ മടവൂര്‍ സ്വാഗതവും ബിജു മാസ്റ്റര്‍ നന്ദിയും പറഞ്ഞു.
 മടവൂര്‍ പഞ്ചായത്തിലെ പ്രധാനപ്പെട്ട വാര്‍ത്തകള്‍ അറിയാനുള്ള ഒരു കൂട്ടായ്മയാണിത്. വാര്‍ത്തകള്‍ അറിയുന്നതിലുപരി  നാട്ടിലെ പ്രധാന വിഷയങ്ങള്‍ ചര്‍ച്ച ചെയ്ത് ആവശ്യമായ പ്രവര്‍ത്തനങ്ങള്‍ ചെയ്യുന്ന ഈ കൂട്ടായ്മ ജനപങ്കാളിത്വത്തോടെ നടത്തിയ തോട് ശുചീകരണത്തോടെയാണ് സാമൂഹ്യ വിഷയങ്ങളില്‍ ഇടപെട്ട് നടത്തിയ ആദ്യ പ്രവര്‍ത്തനം. തുടര്‍ന്ന് കര്‍ഷക സമിതി രൂപീകരിച്ച് കൊണ്ട് ഒരു ഏക്കര്‍ വയലില്‍ നെല്‍ക്കൃഷി ചെയ്യുകയാണ്. നഷ്ടപ്പെട്ട കാര്‍ഷിക സംസ്‌കാരം തിരിച്ച് പിടിക്കുകയും പുതിയ തലമുറക്ക് കൃഷിയുടെ പ്രാധാന്യം ബോധ്യപ്പെടുത്തുകയുമാണ് ഈ കര്‍ഷക സമിതിയുടെ ലക്ഷ്യം.