ചട്ടഞ്ചാല്‍ (കാസര്‍കോട്): സമസ്ത കേരള ജംഇയ്യത്തുല്‍ മുഅല്ലിമീന്‍ പതിനാലാമത് സംസ്ഥാന തല ഇസ്‌ലാമിക് കലാമേളയുടെ സ്വാഗത സംഘം ഓഫിസ് ഉദ്ഘാടനം ചെയ്തു. ചട്ടഞ്ചാല്‍ മാഹിനാബാദിലെ മലബാര്‍ ഇസ്‌ലാമിക് കോംപ്ലക്‌സില്‍ മെയ് 12 മുതല്‍ 14 വരെ മൂന്നു ദിവസങ്ങളിലായാണ് കലാമേള നടക്കുന്നത്.
കേരളത്തിലെ പതിനാല് ജില്ലകളില്‍ നിന്നുള്ള മത്സരാര്‍ഥികള്‍ക്കു പുറമെ തമിഴ്‌നാട്, കര്‍ണാടക, ലക്ഷദ്വീപ് എന്നിവിടങ്ങളില്‍ നിന്നുള്ള 2500 ഓളം പേര്‍ കലാമേളയില്‍ മാറ്റുരക്കും.
സ്വാഗത സംഘം ഓഫിസിന്റെ ഉദ്ഘാടനം ഇന്നലെ രാവിലെ പതിനൊന്നിന് സ്വാഗത സംഘം വൈസ് ചെയര്‍മാന്‍ കെ.കെ അബ്ദുല്ല ഹാജി നിര്‍വഹിച്ചു. സമസ്ത ജില്ലാ ജനറല്‍ സെക്രട്ടറി യു.എം അബ്ദുല്‍ റഹിമാന്‍ മൗലവി ചടങ്ങ് ഉദ്ഘാടനം ചെയ്തു. സമസ്ത ജില്ലാ വൈസ് പ്രസിഡന്റ് ഇ.കെ മഹ്മൂദ് മുസ്‌ലിയാര്‍ അധ്യക്ഷനായി. സയ്യിദ് നജ്മുദ്ദീന്‍ തങ്ങള്‍ അല്‍ യമാനി പ്രാര്‍ഥനക്ക് നേതൃത്വം നല്‍കി. കെ.മൊയ്തീന്‍ കുട്ടിഹാജി, അബൂബക്കര്‍ സാലൂദ് നിസാമി, ടി.പി അലി ഫൈസി, ചെങ്കളം അബ്ദുല്ല ഫൈസി, ഇ.പി ഹംസത്തു സഅദി, അബ്ദുല്‍ഖാദര്‍ നദ്‌വി, ഇബ്രാഹിം ഹാജി കുണിയ, ബേര്‍ക്ക അബ്ദുല്ല ഹാജി എന്നിവര്‍ ചടങ്ങില്‍ സംസാരിച്ചു.