ബത്തേരി: എക്‌സൈസ് വകുപ്പ് മൂലങ്കാവില്‍ നടത്തിയ വാഹന പരിശോധനയില്‍ ലക്ഷങ്ങളുടെ പാന്‍ മസാല പിടികൂടി. സംഭവത്തില്‍ ബത്തേരി മൂത്തേടത്ത് വീട്ടില്‍ സുധീര്‍(36) നെ എക്‌സൈസ് അറസ്റ്റ് ചെയ്തു. മൈസൂര്‍-കോഴിക്കോട് കെ.എസ്.ആര്‍.ടി.സി ബസില്‍ നിന്നും രാത്രി 10 മണിയോടെ മൂലങ്കാവില്‍ വെച്ചാണ് പാന്‍ മസാല പിടികൂടിയത്.

ഹാന്‍സ്, കൂള്‍ എന്നിവയാണ് പരിശോധനയില്‍ പിടിച്ചെടുത്തത്. മൂന്ന് പ്ലാസ്റ്റിക് ചാക്കുകളിലാക്കി ബസ്സിനു മുകളിലാണ് ഇവ സൂക്ഷിച്ചിരുന്നത്. 30 എണ്ണം വീതം കൊള്ളുന്ന ഹാന്‍സിന്റെ 200 വലിയ പാക്കറ്റും 20 എണ്ണം വീതമുള്ള 40 കൂളുമാണ് പിടിച്ചെടുത്തത്.

പിടിച്ചെടുത്ത പാന്‍ മസാലയ്ക്ക് അറുപത്തിമൂന്നര കിലോ തൂക്കമുണ്ട്. കര്‍ണ്ണാടകയില്‍ നിന്നും ഒരു പാക്കറ്റിന് ഏഴു രൂപ തോതില്‍ വാങ്ങുന്ന പാന്‍ മസാല ഇവിടെ 30 രൂപ മുതല്‍ 50 രൂപ തോതിലാണ് വില്‍പ്പന. ഇത് പ്രകാരം രണ്ട് ലക്ഷം രൂപയുടെ പാന്‍ മസാലയാണ് പിടികൂടിയത്. സുധീര്‍ പാന്‍ മസാല ഇവിടെ എത്തിച്ചു നല്‍കുന്ന ഇടനിലക്കാരനാണന്ന് എക്‌സൈസ് അധികൃതര്‍ പറഞ്ഞു.