കൊച്ചി: ഇന്ന് രാത്രി 11.30 വരെയുള്ള സമയത്ത് പൊഴിയൂര്‍ മുതല്‍ കാസര്‍കോട് വരെയുള്ള കേരള തീരത്ത് 3.5 മുതല്‍ 3.8 മീറ്റര്‍ വരെ ഉയരത്തില്‍ തിരമാലയ്ക്ക് സാധ്യതയുണ്ടെന്ന് ദേശീയ സമുദ്ര സ്ഥിതി പഠന കേന്ദ്രം (ഐ.എന്‍.സി.ഒ.ഐ.എസ്) അറിയിച്ചു. തീരദേശവാസികള്‍ ജാഗ്രത പാലിക്കണം. കടലാക്രമണ ഭീഷണി രൂക്ഷമായ തീരമേഖലകളില്‍ താമസിക്കുന്നവര്‍ അധികൃതരുടെ നിര്‍ദേശങ്ങള്‍ അനുസരിച്ച് മാറി താമസിക്കേണ്ടതാണ്. കൊവിഡ് മാനദണ്ഡങ്ങള്‍ അനുസരിച്ചായിരിക്കണം കാംപുകളില്‍ താമസിക്കേണ്ടത്. മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. മത്സ്യബന്ധന യാനങ്ങള്‍ ഹാര്‍ബറില്‍ സുരക്ഷിതമായി കെട്ടിയിട്ട് സൂക്ഷിക്കാനും കേന്ദ്രം നിര്‍ദേശം നല്‍കി. 

  ഇന്നലെ എറണാകുളം ചെല്ലാനം പഞ്ചായത്തില്‍ കടല്‍ കയറി. ഞാറക്കല്‍ വില്ലേജില്‍ 1,13 വാര്‍ഡുകള്‍ ഉള്‍പ്പെടുന്ന തീരപ്രദേശത്താണ് കടല്‍ കയറ്റം രൂക്ഷം. നാശനഷ്ടം റിപ്പോര്‍ട്ടു ചെയ്തിട്ടില്ല. ആവശ്യമെങ്കില്‍ കാംപുകള്‍ തുറക്കുമെന്ന് അധികൃതര്‍ അറിയിച്ചു.