പുല്‍പ്പള്ളി: കബനി പുഴയിലെ ബൈരക്കുപ്പയിലും മരക്കടവിലും മച്ചൂരിലും കടത്ത് തോണി പൂര്‍ണമായി നിലച്ചതോടെ പ്രദേശത്തുകാര്‍ ദുരിതത്തില്‍.
കഴിഞ്ഞ ദിവസം കബനി നദിയില്‍ ജലനിരപ്പ് കുത്തനെ ഉയര്‍ന്നതും കനത്ത കാറ്റുമാണ് തോണി സര്‍വിസ് നിര്‍ത്താന്‍ കാരണം.
ബൈരക്കുപ്പ, മച്ചൂര്‍, ബാവലി, ഹാന്‍പോസ്റ്റ് ഭാഗങ്ങളില്‍ നിന്ന് പുല്‍പ്പള്ളി, മുള്ളന്‍കൊല്ലി പഞ്ചായത്തിലെ കര്‍ഷകരുടെ കൃഷിയിടങ്ങളില്‍ പണിക്കായെത്തിയ തൊഴിലാളികളാണ് അക്കരെ പോകാനാവാതെ ദുരിതത്തിലായത്. ഇതു മൂലം മാനന്തവാടി- കാട്ടിക്കുളം വഴി ചുറ്റി പോകേണ്ട അവസ്ഥയാണ്. കൈയില്‍ പണമില്ലാത്ത തൊഴിലാളികള്‍ ഇക്കരെ തന്നെ കഴിയേണ്ട അവസ്ഥയാണ്. ബൈരക്കുപ്പ, മച്ചൂര്‍ ഭാഗങ്ങളില്‍ നിന്നുള്ള ക്ഷീരകര്‍ഷകരുടെ പാല്‍ സംഭരിക്കാന്‍ കഴിയുന്നില്ല.
കബനിയിലെ ജലനിരപ്പ് താഴ്ന്നാല്‍ മാത്രമേ കടത്ത് തോണി ഇനി ആരംഭിക്കാന്‍ പാടുള്ളൂ എന്നാണ് പൊലിസ് നിര്‍ദ്ദേശം.
എന്നാല്‍ അത്യാവശ്യമായ സാഹചര്യത്തില്‍ തോണി സര്‍വിസ് നടത്താന്‍ അനുമതി നല്‍കണമെന്നും ബൈരക്കുപ്പ, മരക്കടവ് ഭാഗങ്ങളില്‍ വലിയ തോണി ആയതിനാല്‍ അപകടസാധ്യത ഇല്ലെന്നുമാണ് തോണിക്കാര്‍ പറയുന്നത്.