ഉനാവോ: വോട്ടര്‍മാര്‍ക്ക് മുന്‍പില്‍ ഭീഷണിയുമായി വിവാദ നായകനായ ബി.ജെ.പി എം.പിയും ഉത്തര്‍പ്രദേശിലെ ഉനാവോ മണ്ഡലത്തിലെ സ്ഥാനാര്‍ഥിയുമായ സാക്ഷി മഹാരാജ്.

എനിക്ക് വോട്ട് നല്‍കി വിജയിപ്പിച്ചിട്ടില്ലെങ്കില്‍ നിങ്ങളെയെല്ലാം ശപിക്കുമെന്നാണ് അദ്ദേഹം വോട്ടര്‍മാരെ ഭീഷണിപ്പെടുത്തിയത്. ഇന്നലെ മണ്ഡലത്തില്‍ നടന്ന തെരഞ്ഞെടുപ്പ് റാലിയിലാണ് അദ്ദേഹം ഭീഷണി ഉയര്‍ത്തിയത്. ഞാനൊരു സന്യാസിയാണ്. നിങ്ങള്‍ വോട്ട് ചെയ്താല്‍ ഞാന്‍ വിജയിക്കും. പരാജയപ്പെട്ടാല്‍ പൂജയും ഭജനയുമായി ഞാന്‍ കഴിയും. എന്നാല്‍ എനിക്ക് പരാജയമുണ്ടായാല്‍ നിങ്ങളുടെ കുടുംബത്തിന്റെ സന്തോഷം ഇല്ലാതാകും. ഞാന്‍ നിങ്ങളെയാകെ ശപിക്കും-എന്നിങ്ങനെയായിരുന്നു സാക്ഷി മഹാരാജിന്റെ ഭീഷണി.

ഞാന്‍ നിങ്ങളുടെ സ്വത്ത് വകകളൊന്നും ചോദിക്കുന്നില്ല. നിങ്ങളില്‍ നിന്ന് വോട്ട് മാത്രമാണ് ചോദിക്കുന്നതെന്നും അദ്ദേഹം പറഞ്ഞു.
എന്നും വിവാദങ്ങളെ കൂട്ടുപിടിക്കുന്ന സാക്ഷി മഹാരാജ് കഴിഞ്ഞ മാസവും ഇത്തരത്തില്‍ ഒരു പരാമര്‍ശം നടത്തിയത് ഏറെ വിവാദങ്ങള്‍ക്ക് വഴിവച്ചിരുന്നു. 2019ലെ തെരഞ്ഞെടുപ്പില്‍ മോദി സുനാമി ആഞ്ഞടിക്കുമെന്നും പിന്നീട് രാജ്യത്ത് തെരഞ്ഞെടുപ്പ് ഉണ്ടാകില്ലെന്നും അദ്ദേഹം നടത്തിയ പരാമര്‍ശം കടുത്ത വിമര്‍ശനത്തിനാണ് വഴിവച്ചിരുന്നത്. സാക്ഷി മഹാരാജിന്റെ വിവാദ പരാമര്‍ശം വന്നതോടെ സാമൂഹിക മാധ്യമങ്ങളില്‍ ഇതിനെതിരേ രൂക്ഷമായ അഭിപ്രായപ്രകടനങ്ങളാണ് ഉയര്‍ന്നത്.