കൊച്ചി: സ്വര്‍ണക്കടത്ത് കേസില്‍ ചോദ്യം ചെയ്യലിന് ഹാജരായ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറിന്റെ ചോദ്യം ചെയ്യല്‍ പൂര്‍ത്തിയായി. ഇന്നത്തെ ചോദ്യം ചെയ്യല്‍ പത്തുമണിക്കൂര്‍ നീണ്ടുനിന്നു. കൊച്ചി എന്‍.ഐ.എ ആസ്ഥാനത്ത് രാവിലെ ഒമ്പതരയോടെ തുടങ്ങിയ ചോദ്യം ചെയ്യലാണ് വൈകുന്നേരം ഏഴുമണിയോടെ പൂര്‍ത്തിയായത്. ഇനിയും ഇദ്ദേഹത്തെ ചോദ്യം ചെയ്യുമെന്നുതന്നെയാണ് വ്യക്തമാകുന്നത്. പുലര്‍ച്ചെ നാലരയോടെയാണ് ശിവശങ്കര്‍ തിരുവനന്തപുരത്തെ വീട്ടില്‍ നിന്നും പുറപ്പെട്ടത്.

എന്‍.ഐ.എ.യുടെ കൊച്ചി ഓഫീസില്‍ പ്രത്യേകം തയ്യാറാക്കിയ മുറിയിലായിരുന്നു ചോദ്യംചെയ്യല്‍. ദൃശ്യങ്ങള്‍ വീഡിയോയില്‍ പകര്‍ത്തുകയും ചെയ്യും. 56 ചോദ്യങ്ങളാണ് ശിവശങ്കറിനായി തയ്യാറാക്കിയിരുന്നത്. കസ്റ്റംസും എന്‍.ഐ.എയും ശിവശങ്കറില്‍ നിന്നു തേടിയ വിവരങ്ങളുടേയും സ്വര്‍ണക്കടത്തുകേസിലെ പ്രതികളുടെ മൊഴികളുടേയും അടിസ്ഥാനത്തിലാണ് ചോദ്യങ്ങള്‍ തയ്യാറാക്കിയിരിക്കുന്നത്.

ചോദ്യം ചെയ്യലിനായി എന്‍.ഐ.എയുടെ മുതിര്‍ന്ന ഉദ്യോഗസ്ഥര്‍ അടങ്ങുന്ന വിദഗ്ധ സംഘം ഇന്നലെ കൊച്ചിയിലെത്തിയിരുന്നു.
നേരത്തെ കസ്റ്റംസ് ശിവശങ്കറില്‍ നിന്ന് വിവരശേഖരണം നടത്തുകയും ഒന്‍പത് മണിക്കൂര്‍ ചോദ്യം ചെയ്യുകയും ചെയ്തിരുന്നു. ഇന്നത്തെ ചോദ്യം ചെയ്യലോടെ ശിവശങ്കര്‍ ഒന്നുകില്‍ പ്രതിയോ അല്ലെങ്കില്‍ സാക്ഷിയോ ആകുമെന്നായിരുന്നു പ്രതീക്ഷിച്ചിരുന്നത്. എന്നാല്‍ എന്‍.ഐ.എ വൃത്തങ്ങളില്‍ നിന്ന് ഇതുവരെ വിവരങ്ങളൊന്നും പുറത്തുവന്നിട്ടില്ല.

നാളെ രാവിലെ പത്തുമണിക്ക് വീണ്ടും ചോദ്യം ചെയ്യലിനു ഹാജരാകാന്‍ എം.ശിവശങ്കറിന് എന്‍.ഐ.എ നോട്ടിസ് നല്‍കിയിട്ടുണ്ട്. രാവിലെ ഹാജരാകാനായി അദ്ദേഹം ഇന്നു കൊച്ചിയില്‍ തുടരുമെന്നാണ് വ്യക്തമാകുന്നത്.