തിരുവന്തപുരം: ഡി.ജി.പിയായി നിയമിക്കണമെന്ന വിധി നടപ്പാക്കാത്ത സംസ്ഥാന സര്‍ക്കാര്‍ നടപടിക്കെതിരെ ടി.പി സെന്‍കുമാര്‍ വീണ്ടും സുപ്രിംകോടതിയിലേക്ക്. സര്‍ക്കാരിനെതിരെ കോടതിയലക്ഷ്യ ഹരജി നല്‍കാനാണ് തീരുമാനം. തിങ്കളാഴ്ച ഹരജി സമര്‍പ്പിക്കും.

പിണറായി സര്‍ക്കാര്‍ അധികാരത്തിലേറിയ ഉടനെ ഡി.ജി.പി സ്ഥാനത്തു നിന്നു മാറ്റിയതിനെത്തുടര്‍ന്നാണ് സെന്‍കുമാര്‍ കോടതിയെ സമീപിച്ചത്. കേസില്‍ കഴിഞ്ഞ 24ന് സുപ്രിം കോടതിയില്‍ നിന്ന് സെന്‍കുമാറിന് അനുകൂലമായ വിധിയുണ്ടായി. സെന്‍കുമാറിനെ ഡി.ജി.പി സ്ഥാനത്തേക്ക് തിരിച്ചെടുക്കണമെന്നായിരുന്നു കോടതി വിധി.

വിധിപ്പകര്‍പ്പ് സര്‍ക്കാരിനു കിട്ടിയ ഉടനെ വിധി നടപ്പിലാക്കുമെന്ന് അന്ന് മുഖ്യമന്ത്രി പിണറായി വിജയന്‍ പ്രതികരിച്ചിരുന്നെങ്കിലും സെന്‍കുമാറിനെ വീണ്ടും ഡി.ജി.പിയായി നിയമിക്കുന്ന കാര്യത്തില്‍ ഇതുവരെ തീരുമാനമൊന്നും എടുത്തിട്ടില്ല. കൃത്യമായ പ്രതികരണമൊന്നും സര്‍ക്കാരിന്റെ ഭാഗത്തുനിന്ന് ലഭിക്കാത്തതിനെത്തുടര്‍ന്നാണ് കോടതീയലക്ഷ്യ ഹരജിയുമായി സെന്‍കുമാര്‍ വീണ്ടും കോടതിയെ സമീപിക്കാന്‍ തീരുമാനിച്ചത്.

സെന്‍കുമാറിനു വേണ്ടി കേസ് വാദിച്ച അഡ്വ. ഹാരിസ് ബീരാന്‍ വഴിയായിരിക്കും ഹരജിയും നല്‍കുക.