കണിയാമ്പറ്റ: കൃഷിയിടത്തില്‍ നട്ടുവളര്‍ത്തിയ കഞ്ചാവ് ചെടികള്‍ എക്‌സൈസ് സംഘം പിടികൂടി. കണിയാമ്പറ്റ-കൂടോത്തുമ്മല്‍ ചീക്കല്ലൂര്‍ വട്ടപറമ്പില്‍ ജോര്‍ജ്ജ് (67)വീട്ടുവളപ്പില്‍ നട്ടുവളര്‍ത്തിയ കഞ്ചാവു ചെടികളാണ് പിടികൂടിയത്.
 അഞ്ചര ഏക്കറോളം വരുന്ന കാപ്പിത്തോട്ടത്തിലെ ഇയാള്‍ താമസിക്കുന്ന ഷെഡ്ഡിനോട് ചേര്‍ന്ന് ചാക്കില്‍ മണ്ണ് നിറച്ചാണ് കഞ്ചാവ് വളര്‍ത്തിയിരുന്നത്. മൂന്ന് മാസം പ്രായമുള്ള അഞ്ചടിയോളം ഉയരമുള്ള നാലു ചെടികളാണ് എക്‌സൈസ് പിടികൂടിയത്.
രഹസ്യ വിവരത്തിന്റെ അടിസ്ഥാനത്തില്‍ എക്‌സൈസ് ഇന്റലിജെന്റ്‌സ് ഉദ്യോഗസ്ഥരും കല്‍പ്പറ്റ റെയ്ഞ്ച് അധികൃതരും ചേര്‍ന്ന് നടത്തിയ പരിശോധനയിലാണ് വീട്ടുമുറ്റത്തെ കഞ്ചാവ് കൃഷി കണ്ടെത്തിയത്.
പൂവിട്ട് കായ ഉണ്ടായ നിലയിലാണ് ചെടികള്‍. പ്രതിയേയും തൊണ്ടി മുതലും വടകര എന്‍.ഡി.പി.എസ് കോടതിയില്‍ ഹാജരാക്കുമെന്ന് എക്‌സൈസ് ഇന്റലിജെന്‍സ് വിഭാഗം അറിയിച്ചു.