കൊണ്ടോട്ടി: കരിപ്പൂര്‍ എയര്‍പോര്‍ട്ട് സംരക്ഷിക്കണമെന്നാവശ്യപ്പെട്ട് യൂത്ത് കോണ്‍ഗ്രസ് മലപ്പുറം പാര്‍ലമെന്റ് കമ്മിറ്റിയുടെ മാസ് മെയിലിങ് കാംപയിനിന് കേന്ദ്ര വ്യോമയാന മന്ത്രി സുരേഷ് പ്രഭുവിന്റെ മറുപടി. വലിയ വിമാനങ്ങള്‍ എത്രയും പെട്ടെന്ന് കരിപ്പൂരില്‍ നിന്ന് സര്‍വിസ് പുനരാരംഭിക്കണമെന്നാവശ്യപ്പെട്ട് നിരവധി നിവേദനങ്ങള്‍ ലഭിക്കുന്നുണ്ടെന്നും ആയതിനാല്‍ എയര്‍പോര്‍ട്ട് അതോറിറ്റിയോട് സൗകര്യങ്ങള്‍ വര്‍ധിപ്പിക്കാനും സര്‍വ്വീസിന് വേണ്ട നടപടികള്‍ ഡി.ജി.സി.എ യോട് ചെയ്യാനും ആവശ്യപ്പെട്ടിട്ടുണ്ട് എന്നാണ് മന്ത്രിയുടെ ട്വീറ്റ്.
കരിപ്പൂര്‍ സംരക്ഷിക്കുകയെന്നാവശ്യപ്പെട്ട് യൂത്ത് കോണ്‍ഗ്രസ് മലപ്പുറം പാര്‍ലമെന്റ് കമ്മിറ്റി സമരങ്ങളും അതോടൊപ്പം കേന്ദ്ര മന്ത്രിക്ക് മാസ് മെയിലിങ് എന്ന പേരില്‍ ആയിരക്കണക്കിന് ഇ-മെയില്‍ അയക്കുകയും സേവ് കാലിക്കറ്റ് എയര്‍പോര്‍ട്ട് എന്ന് ഹാഷ് ടാഗോടു കൂടി ഫെയ്‌സ് ബുക്കിലും ട്വിറ്ററിലും മന്ത്രിയുടെ പോസ്റ്റുകള്‍ക്ക് താഴെ കമന്റും ട്വീറ്റും ചെയ്തിരുന്നു. അതിനാണ് മന്ത്രി നേരിട്ട് മറുപടി നല്‍കിയത്.
കരിപ്പൂര്‍ പൂര്‍വ സ്ഥിതിയില്‍ വലിയ വിമാനങ്ങള്‍ സര്‍വിസ് പുനരാരംഭിക്കുന്നത് വരെ പ്രക്ഷോഭം തുടരാനാണ് യൂത്ത് കോണ്‍ഗ്രസ് തീരുമാനം. ആവശ്യം ഉന്നയിച്ച് 28 ന് പാര്‍ലിമെന്റ് മാര്‍ച്ച് നടത്താനും യൂത്ത് കോണ്‍ഗ്രസ് മലപ്പുറം പാര്‍ലമെന്റ് കമ്മിറ്റി തീരുമാനിച്ചു.