വടകര: കോ-ഓപറേറ്റിവ് കോളജില്‍ എസ്.എഫ്.ഐ-എ.ബി.വി.പി പ്രവര്‍ത്തകര്‍ തമ്മില്‍ ഏറ്റുമുട്ടി. 15ഓളം പേര്‍ക്ക് പരുക്കേറ്റു. മേപ്പയ്യൂര്‍ കാരാട് എസ്.എഫ്.ഐ നേതാവിനെ വെട്ടിപ്പരുക്കേല്‍പ്പിച്ച സംഭവത്തില്‍ പ്രതിഷേധിച്ച് നടന്ന പ്രകടനത്തിനിടെയാണു സംഘര്‍ഷം. എ.ബി.വി.പി പ്രവര്‍ത്തകര്‍ നടത്തിയ ചെങ്ങന്നൂര്‍ വിശാല്‍ അനുസ്മരണ പരിപാടിക്കിടെയാണ് എസ്.എ.ഫ്.ഐയുടെ പ്രതിഷേധ പ്രകടനമെത്തിയത്. ഇതിനു തുടര്‍ച്ചയായുണ്ടായ വാക്കേറ്റം സംഘര്‍ഷത്തിലെത്തുകയായിരുന്നു. പരുക്കേറ്റവരെ എത്തിച്ച വടകര ജില്ലാ ആശുപത്രിയിലും വിദ്യാര്‍ഥികള്‍ ഏറ്റുമുട്ടി. എസ്.എഫ്.ഐ ഏരിയാ സെക്രട്ടറി ടി.കെ അഖില്‍, ചെയര്‍മാന്‍ പ്രണവ്, അമൃത്, അഭിന്‍കൃഷ്ണ, ആദിത്യ, ഗായത്രി, എ.ബി.വി.പി നഗര്‍ പ്രസിഡന്റ് കേദാര്‍നാഥ്, പ്രവര്‍ത്തകരായ വിഷ്ണു, സുജിത്ത്, കോഴിക്കോട് ജില്ലാ പ്രചാരക് ആശ, ആര്‍ദ്ര, അനുശ്രീ, ഐശ്വര്യ, ശ്രീകാവ്യ, ഹൃദ്യ എന്നിവര്‍ക്കാണു പരുക്കേറ്റത്. വടകര പൊലിസ് സ്ഥലത്തെത്തി സ്ഥിതിഗതികള്‍ നിയന്ത്രിച്ചു.