തൃക്കരിപ്പൂര്‍: അപകടം പതിയിരിക്കുന്ന മണല്‍ക്കുഴികളുടെ കാര്യത്തില്‍ നടപടി വേണമെന്ന ആവശ്യം ശക്തമാകുന്നു. മൂന്നു പതിറ്റാണ്ടുകള്‍ക്ക് മുന്‍പ് വെള്ളാപ്പ്, ആയിറ്റി, മാച്ചിക്കാട് പ്രദേശങ്ങളിലെ വലിയ മണല്‍ക്കൂനകളായിരുന്നു ആ പ്രദേശങ്ങളുടെ ശുദ്ധജല സൗഭാഗ്യത്തിനു കാരണമായത്. എന്നാല്‍ ഇന്ന് ശുദ്ധ ജലത്തിന് പകരം നഞ്ചു കലങ്ങിയ വെള്ളവും മണല്‍ക്കൂനകള്‍ക്കു പകരം മരണം മാടിവിളിക്കുന്ന മണലെടുത്ത കുഴികളുമുള്ള ഇടമായി ഈ പ്രദേശങ്ങള്‍ മാറിയിരിക്കുകയാണ്.
അനിയന്ത്രിത മണലൂറ്റാണ് ഈ പ്രദേശങ്ങളിലെ സൗഭാഗ്യങ്ങള്‍ തട്ടിയെടുത്തത്. മണല്‍ ഊറ്റിയെടുത്ത് ഉപേക്ഷിച്ച നൂറുകണക്കിന് വന്‍ കുഴികളാണ് നിലവില്‍ ഈ പ്രദേശങ്ങളിലുള്ളത്. കാലവര്‍ഷമായതോടെ കുഴികളിലെല്ലാം വെള്ളം നിറഞ്ഞ് അപകടം പതിയിരിക്കുന്ന അവസ്ഥയിലാണ്.
തിങ്കളാഴ്ച ബന്ധുവിന്റെ വീട്ടില്‍ കല്യാണം കൂടാന്‍ വന്ന ഒന്‍പതാം ക്ലാസ് വിദ്യാര്‍ഥി മുഹമ്മദ് മുഷ്‌റഫിന്റെ ജീവന്‍ തട്ടിയെടുത്തത് ഇത്തരത്തിലുള്ള മണല്‍ക്കുഴിയാണ്. മൂന്നര പതിറ്റാണ്ടുകള്‍ക്ക് മുന്‍പ് ഇ.കെ നായനാര്‍ മുഖ്യമന്ത്രിയായിരിക്കുന്ന അവസരത്തില്‍ ആയിറ്റി പ്രദേശം കേന്ദ്രീകരിച്ച് താപനിലയം അനുവദിച്ചിരുന്നു. ഈ സാഹചര്യത്തിലാണ് ഇവിടങ്ങളിലെ മണല്‍ക്കകൂനകള്‍ നീക്കം ചെയ്തു തുടങ്ങിയത്. താപനിലയത്തിന് പ്രദേശ വാസികള്‍ എതിരായതോടെ താപനിലയം സ്ഥാപിക്കുന്നതില്‍നിന്നു സര്‍ക്കാറും പിന്തിരിഞ്ഞു.
എന്നാല്‍ മണല്‍ നനം തുടര്‍ന്നു കൊണ്ടിരുന്നു. പത്തടിയോളം ഉയരത്തില്‍ മണല്‍ക്കൂനകള്‍ ഉണ്ടായിരുന്ന ആയിറ്റി വെള്ളാപ്പ് മേഖലകള്‍ ഇപ്പോള്‍ ഭൂമി നിരപ്പില്‍ നിന്ന് പത്ത് അടിയോളം താഴ്ചയുള്ള കുഴികളായി മാറുകയും ചെയ്തു. ഭൂ നിരപ്പിന് മുകളില്‍ നിന്ന് മണല്‍ ഖനനം ചെയ്തവര്‍ ഭൂമിയും തുരന്ന് മണല്‍ തട്ടിയെടുത്തു തുടങ്ങി. എന്നാല്‍ മണലെടുത്ത കുഴികള്‍ മൂടാന്‍ ഇവര്‍ തയാറായതുമില്ല. മറ്റൊരു അപകടം സംഭവിക്കുന്നതിന് മുന്‍പ് പ്രശ്‌നം പരിഹരിക്കാന്‍ അധികൃതര്‍ ഇടപെടുമെന്ന വിശ്വാസത്തിലാണ് പ്രദേശവാസികള്‍.
രാത്രിയുടെ മറവില്‍ തുടങ്ങുന്ന മണല്‍ ഖനനം പുലരുന്നതുവരെ നീളും. പുലര്‍ച്ചെ ചീറിപായുന്ന ലോറികള്‍ പാല്‍, പത്ര വിതരണക്കാര്‍ക്കും, മദ്‌റസയില്‍ പോകുന്ന വിദ്യാര്‍ഥികള്‍ക്കും, പ്രഭാത സവാരിക്കാര്‍ക്കും ഭീഷണിയാണ്.