പനമരം: പനമരം പുഴയോരത്തെ വാച്ച് ടവര്‍ യഥാര്‍ത്യമായില്ലെങ്കിലും പോത്തുകള്‍ക്ക് തൊഴുത്തായി. കോടികള്‍ മുടക്കി നിര്‍മിച്ച വാച്ച് ടവറാണ് കാലി വളര്‍ത്തുകാര്‍ക്ക് ഗുണമായിരിക്കുന്നത്. രണ്ടുവര്‍ഷം മുന്‍പാണ് പനമരത്ത് വാച്ച്ടവര്‍ നിര്‍മാണം തുടങ്ങിയത്.
കൊറ്റില്ലത്തിലെ പക്ഷികളെ നിരീക്ഷിക്കാനാണ് ടവര്‍ നിര്‍മിക്കുന്നതെന്ന് അധികൃതര്‍ പറഞ്ഞിരുന്നു. ടവറിന്റെ തറ നിര്‍മാണം പൂര്‍ത്തിയാക്കിയ ശേഷം പിന്നീട് ഒരു നിലയും പണിതു. അതിന് ശേഷം ഒരു നിര്‍മാണ പ്രവൃത്തിയും നടന്നില്ലെന്ന് മാത്രമല്ല ടവറിന് ചുറ്റം കാട് മൂടിയ അവസ്ഥയുമാണ്.
അധികൃതര്‍ ടവര്‍ ഉപേക്ഷിച്ച നിലയിലാണ് ഇപ്പോള്‍. ഇതിനിടയില്‍ കഴിഞ്ഞ ഓരാഴ്ചയിലേറെയായി പോത്തുകളെ കെട്ടാന്‍ ടവര്‍ ഉപയോഗിക്കുകയാണ് കാലി വളര്‍ത്തുകാര്‍. പത്തോളം പോത്തുകളെയാണ് ഇവിടെ മഴ നയാതെ കെട്ടി പരിപാലിക്കുന്നത്. ഇതിനോടകം അമ്പത് ലക്ഷത്തോളം രൂപ ടൂറിസം വകുപ്പ് മുടക്കിയതായിട്ടാണ് അറിവ്. ഒരാഴ്ചയായി ഇതിന്റെ ഗുണം ലഭിച്ചിരിക്കുന്നത് കാലികളെ വളര്‍ത്തുകാര്‍ക്കാണെന്ന് മാത്രം