കൊടുവള്ളി: കേരളത്തിലെ പ്രമുഖ സ്വര്‍ണ വ്യാപാരകേന്ദ്രമായ കൊടുവള്ളി ടൗണില്‍ നിരീക്ഷണ സംവിധാനം ശക്തമാക്കുന്നു.
ദേശീയപാതയില്‍ ഓപ്പണ്‍ എയര്‍‌സ്റ്റേജ് പരിസരത്തെ സില്‍സില ജ്വല്ലറിയില്‍ കഴിഞ്ഞ മെയ് മാസത്തില്‍ നടന്ന കവര്‍ച്ചയുടെ പശ്ചാത്തലത്തില്‍ വ്യാപാരി വ്യവസായി ഏകോപന സമിതി കൊടുവള്ളി യൂനിറ്റ് സമര്‍പ്പിച്ച നിവേദനത്തിന്റെ അടിസ്ഥാനത്തില്‍ കൊടുവള്ളി ടൗണില്‍ സി.സി.ടി.വി കാമറകള്‍ സ്ഥാപിക്കാന്‍ പത്തു ലക്ഷം രൂപ അനുവദിച്ചതായി കാരാട്ട് റസാഖ് എം.എല്‍.എ അറിയിച്ചു.
കൊടുവള്ളി ബസ് സ്റ്റാന്റ് പരിസരം, ഓപ്പണ്‍ എയര്‍ സ്റ്റേജ് പരിസരം, മാര്‍ക്കറ്റ് റോഡ് എന്നിവിടങ്ങളിലാണ് കാമറകള്‍ സ്ഥാപിക്കുക. കൊടുവള്ളി പൊലിസ് സ്റ്റേഷനില്‍ നിന്ന് നിരീക്ഷിക്കാവുന്ന രീതിയിലായിരിക്കും സി.സി.ടി.വി സംവിധാനം ഒരുക്കുക. നടപടി ക്രമങ്ങള്‍ ഉടന്‍ പൂര്‍ത്തിയാക്കി സി.സി.ടി.വി സ്ഥാപിക്കല്‍ പ്രവൃത്തി ആരംഭിക്കുമെന്ന് കാരാട്ട് റസാഖ് എം.എല്‍.എ സുപ്രഭാതത്തോട് പറഞ്ഞു.
ടൗണ്‍ നിരീക്ഷണ വലയത്തിലാകുന്നതോടെ മോഷണം, ലഹരി വില്‍പന, സാമൂഹ്യവിരുദ്ധ ശല്യം, റോഡ് സുരക്ഷാ നിയമ ലംഘനം എന്നിവ നിയന്ത്രിക്കാനാകുമെന്ന് വ്യാപാരി വ്യാവസായി ഏകോപന സമിതി കൊടുവള്ളി യൂണിറ്റ് പ്രസിഡന്റ് പി.ടി.എ ലത്തീഫ്, ജനറല്‍ സെക്രട്ടറി ടി.പി അര്‍ഷാദ് എന്നിവര്‍ സംയുക്ത വാര്‍ത്താകുറിപ്പില്‍ പറഞ്ഞു.