തിരുവനന്തപുരം: സംസ്ഥാനത്തു കഴിഞ്ഞ ദിവസങ്ങളില്‍ തുടര്‍ച്ചയായി പെയ്തുകൊണ്ടിരിക്കുന്ന അതിതീവ്രമഴയില്‍ ഇന്നുമുതല്‍ കുറവുണ്ടാകുമെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം. 

ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം ശക്തമാകാന്‍ സാധ്യതയില്ലാത്തതിനാല്‍ ഇന്ന് എവിടെയും റെഡ് അലര്‍ട്ട് നല്‍കിയിട്ടില്ല. 

രാവിലെ മുതല്‍ ആലപ്പുഴ, എറണാകുളം, മലപ്പുറം, കണ്ണൂര്‍ ജില്ലകളിലാണ് മഴ അതിശക്തമാകാന്‍ സാധ്യതയുള്ളത്. ഈ ജില്ലകളില്‍ 204 മില്ലീമീറ്റര്‍ വരെ പെയ്യുന്ന അതിശക്തമായ മഴയായതിനാല്‍ കേന്ദ്ര കാലാവസ്ഥാ വകുപ്പ് ഓറഞ്ച് അലര്‍ട്ട് നല്‍കിയിട്ടുണ്ട്. കൂടാതെ കൊല്ലം, പത്തനംതിട്ട, ഇടുക്കി, തൃശൂര്‍, കോഴിക്കോട്, വയനാട്, കാസര്‍കോട് ജില്ലകളില്‍ യെല്ലോ അലര്‍ട്ടും നല്‍കി. 

ശക്തമായ മഴ പെയ്യുന്ന സാഹചര്യത്തില്‍ ജനങ്ങള്‍ ഒരു കാരണവശാലും നദികള്‍ മുറിച്ചു കടക്കാനോ, നദികളിലോ മറ്റ് ജലാശയങ്ങളിലോ കുളിക്കാനോ മീന്‍പിടിക്കാനോ മറ്റ് ആവശ്യങ്ങള്‍ക്കോ ഇറങ്ങാന്‍ പാടില്ലെന്ന് സംസ്ഥാന ദുരനന്ത നിവാരണ അതോറിറ്റി നിര്‍ദേശം നല്‍കി. 

ജലാശയങ്ങള്‍ക്ക് മുകളിലെ മേല്‍പ്പാലങ്ങളില്‍ കയറി കാഴ്ച കാണുകയോ സെല്‍ഫിയെടുക്കയോ കൂട്ടം കൂടി നില്‍ക്കുകയോ ചെയ്യാന്‍ പാടില്ലെന്നും മുന്നറിയിപ്പുണ്ട്. നാളെ മുതല്‍ മഴയുടെ അളവില്‍ കാര്യമായ കുറവുണ്ടാകുമെന്നും വരുംദിവസങ്ങളില്‍ വടക്കന്‍ ജില്ലകളില്‍ മാത്രമാണ് മഴയ്ക്ക് സാധ്യതയെന്നുമാണ് വിലയിരുത്തല്‍. 

കൂടാതെ അറബിക്കടലില്‍ 60 കിലോമീറ്റര്‍ വരെ അതിശക്തമായ കാറ്റടിക്കാന്‍ സാധ്യതയുള്ളതിനാല്‍ കേരള തീരത്ത് നിന്നും മത്സ്യബന്ധനത്തിന് പോകരുതെന്നും ശക്തമായ തിരമാലകള്‍ക്ക് സാധ്യതയുള്ളതിനാല്‍ കടല്‍ തീരത്തുള്ളവര്‍ ജാഗ്രത പാലിക്കണമെന്നും മുന്നറിയിപ്പിലുണ്ട്.