പാലക്കാട്: ബഹുരാഷ്ട്ര കുത്തകയായ കൊക്കക്കോള കമ്പനിക്ക് മുന്നില്‍ കഴിഞ്ഞ 18 വര്‍ഷമായി കുടില്‍കെട്ടി സമരം നടത്തുന്ന സമരക്കാര്‍ ഇത്തവണ ആലത്തൂരിലെ യു.ഡി.എഫ് സ്ഥാനാര്‍ഥിയും ദലിത് ആക്ടിവിസ്റ്റുമായ രമ്യ ഹരിദാസിന് വോട്ടു നല്‍കും.
രമ്യ ഹരിദാസ് കോള വിരുദ്ധസമര പ്രവര്‍ത്തകയുമായിരുന്നു. കഴിഞ്ഞ ദിവസം പ്ലാച്ചിമട സമരപന്തലില്‍ നടന്ന പ്ലാച്ചിമട കോളവിരുദ്ധ സമരസമിതി, പ്ലാച്ചിമട സമര ഐക്യദാര്‍ഢ്യ സമിതി യോഗത്തിലാണ് തീരുമാനമെടുത്തത് . 216 കോടി രൂപയുടെ നഷ്ടപരിഹാരം നല്‍കണമെന്നാവശ്യപ്പെട്ടാണ് സമരം നടത്തി വരുന്നത്. ബി.ജെ.പി ഭരിക്കുന്ന കേന്ദ്ര സര്‍ക്കാര്‍ പ്ലാച്ചിമട നഷ്ടപരിഹാര ട്രിബുണല്‍ ബില്‍ പരിഗണിക്കാതെ തിരിച്ചയച്ചിരുന്നു.
കേരളം ഭരിക്കുന്ന ഇടതു സര്‍ക്കാര്‍ പ്ലാച്ചിമട ട്രിബുണല്‍ ബില്ല് നിയമസഭയില്‍ അവതരിപ്പിച്ചു്്് ഇരകള്‍ക്ക് നഷ്ടപരിഹാരം വാങ്ങിച്ചു നല്‍കുമെന്ന് പ്രകടന പത്രികയില്‍ പറഞ്ഞിരുന്നു. മൂന്ന് വര്‍ഷം കഴിഞ്ഞിട്ടും ഇതിനു വേണ്ടിയുള്ള നടപടികളൊന്നും സ്വീകരിക്കാന്‍ തയാറാവാത്തതിലും പ്രതിക്ഷേധിച്ചാണ് എന്‍.ഡി.എ, ഇടതു മുന്നണി സ്ഥാനാര്‍ഥികള്‍ക്ക് വോട്ടു നല്‍കേണ്ടതില്ലെന്ന് തീരുമാനിച്ചത്.
ഐക്യദാര്‍ഢ്യസമിതിയുടെ നേതൃത്വത്തില്‍ ഇടതു്്, എന്‍.ഡി.എ. മുന്നണികള്‍ കോള വിരുദ്ധ സമരക്കാരോട് കാണിക്കുന്ന നീതികേടിനെതിരെ പ്രചാരണവും നടത്തിവരുന്നുണ്ടെന്ന് ഐക്യ ദാര്‍ഢ്യ സമിതി സംസ്ഥാനജന. കണ്‍വീനര്‍ ആറുമുഖന്‍ പത്തിച്ചിറയും, കോളവിരുദ്ധ സമര സമിതി ചെയര്‍മാന്‍ വിളയോടി വേണുഗോപാലും അറിയിച്ചു.