കോഴിക്കോട്: ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി എം.കെ രാഘവന് വോട്ടഭ്യര്‍ഥിച്ച് മുന്‍ ഇന്ത്യന്‍ ക്രിക്കറ്റ് താരവും പഞ്ചാബ് സാംസ്‌കാരിക മന്ത്രിയുമായ നവജ്യോത് സിങ് സിദ്ദുവിന്റെ റോഡ്‌ഷോ. ഇന്നലെ ഉച്ചയോടെയാണ് സിദ്ദു നഗരത്തില്‍ റോഡ് ഷോ നടത്തിയത്.
രാവിലെ 12.40ന് ചാലപ്പുറത്തുനിന്ന് ആരംഭിച്ച റോഡ്‌ഷോക്ക് വന്‍ സ്വീകരണമാണ് ലഭിച്ചത്. ഫ്രാന്‍സിസ് റോഡ്, ഇടിയങ്ങര, സൗത്ത് ബീച്ച് വഴി 1.20ന് മറൈന്‍ ഗ്രൗണ്ടിനടുത്തെത്തി.
കെ.എസ്.യു സംസ്ഥാന പ്രസിഡന്റ് കെ.എം അഭിജിത്ത്, എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂര്‍, മുസ്‌ലിം ലീഗ് ജില്ലാ പ്രസിഡന്റ് ഉമര്‍ പാണ്ടികശാല, മഹിളാ കോണ്‍ഗ്രസ് ജില്ലാ പ്രസിഡന്റ് പി. ഉഷാദേവി, യു.ഡി.എഫ് ലോക്‌സഭാ മണ്ഡലം ജനറല്‍ കണ്‍വീനര്‍ അഡ്വ. പി.എം നിയാസ്, വി.ടി നിഹാല്‍, പി.പി നൗഷിര്‍ തുടങ്ങിയവര്‍ റോഡ്‌ഷോയെ അനുഗമിച്ചു.
ബി.ജെ.പിയും നരേന്ദ്രമോദിയും ഇന്ത്യയെ വിഭജിക്കാന്‍ നോക്കുകയാണെന്ന് സിദ്ദു പറഞ്ഞു. ജി.എസ്.ടിയും നോട്ട് നിരോധനവും ജനങ്ങളെ വളരെയേറെ ബുദ്ധിമുട്ടിച്ചു. കോണ്‍ഗ്രസാണ് ഇന്ത്യയില്‍ മതേതരത്വം കൊണ്ടുവന്നതെന്നും അദ്ദേഹം ഓര്‍മിപ്പിച്ചു.