കോവിഡ് വ്യാപനം രൂക്ഷമായതോടെ‌ കഴിഞ്ഞ മൂന്ന് മാസങ്ങൾ റിയാദ് കെ.എം.സി.സി വെൽഫെയർ വിംഗിന്റെ പ്രവർത്തകർക്ക് വിശ്രമമില്ലാത്ത ദിനങ്ങളായിരുന്നു. ഭയത്തിന്റെ നിഴലിൽ പലരും പുറത്തിറങ്ങാതെ സുരക്ഷിത സ്ഥലങ്ങളിൽ കഴിഞ്ഞു കൂടിയപ്പോൾ പ്രയാസപ്പെടുന്നവന്റെ അടുത്തേക്ക് സേവനങ്ങളുമായി എത്തുകയായിരുന്നു റിയാദ് കെ.എം.സി.സി. ഒരു ഭാഗത്ത് അസുഖ ബാധയുള്ളവർക്കും രോഗ ലക്ഷണമുള്ള വർക്കും ആശ്വാസമെത്തിക്കുകയും ഭക്ഷണവും മരുന്നുമടക്ക മുള്ള അവശ്യ വസ്തുക്കൾ എത്തിച്ചു നൽകുന്നതിനും ഈ കൂട്ടായ്മ രംഗത്ത് വന്നു. റിയാദിൽ മരിച്ച ചെമ്മാട് സ്വദേശി സഫ് വാന്റെ മയ്യിത്ത് സമിതി ചെയർമാൻ സിദ്ദീഖ് തുവ്വുർ ഒറ്റക്ക് ഖബറടക്കിയത് വലിയ വാർത്തയായിരുന്നു. ഇതിന്‌ ശേഷം  ടെലികെയർ വാട്സ് ആപ്പ് ഗ്രൂപ്പ് രൂപീകരിച്ച് സഫ് വാനുമായി ഇടപ്പെട്ടവരെ കണ്ടെത്തുകയും അവർക്ക് ആവശ്യമായ ചികിത്സാ സൗകര്യങ്ങളും നിർദ്ദേശങ്ങളും നൽകുകയുണ്ടായി. വിദഗ്ദരായ ഡോക്ടർമാരും ഫാർമസിസ്റ്റുകളും ആരോഗ്യ പ്രവർത്തകരും അടങ്ങുന്ന ടെലികെയർ വിംഗ് 24 മണിക്കൂറും സേവന സന്നദ്ധരായി. റിയാദിൽ കോവിഡ് മരണങ്ങൾ വർധിച്ചതോടെ  അധികൃതരുടെ സഹായത്തോടെ  കോവിഡ് ബാധിച്ചും അല്ലാതെയും മരിച്ചവരുടെയും നടപടികൾ പൂർത്തിയാകാതെ വിവിധ ആശുപത്രികളിലുള്ള മയ്യിത്തുകളും ദാറുസ്സലാം വിംഗ് ഏറ്റെടുത്ത് മറവ് ചെയ്തു.

 

ആശുപത്രി, എംബസി, പോലീസ് സ്റ്റേഷൻ, ഇന്ത്യയിൽ നിന്നുള്ള ബന്ധുക്കളുടെ അനുമതി പത്രം തുടങ്ങി ആവശ്യമായ ഔദ്യോഗിക രേഖകളെല്ലാം ശരിയാക്കുന്നതിന്‌ ഈ പ്രവർത്തകർ സദാ കർമ്മ നിരതരായി. ആരോഗ്യ വകുപ്പും ഇന്ത്യൻ എംബസി യുമെല്ലാം ഈ കൂട്ടായ്മക്ക് ആവശ്യമായ പിന്തുണ നൽകാൻ മുന്നോട്ട് വന്നു. കോവിഡ് ബാധിച്ച് മരിച്ചവരെ സ്വന്തം നെഞ്ചോട് ചേർത്ത് ഖബറിലേക്ക് എടുത്തു വെക്കുന്ന ദാറുസ്സലാം പ്രവർത്തകരുടെ സേവന പ്രവർത്തനങ്ങളെ പൊതു സമൂഹം ആദരവോടെയാണ്‌ നോക്കി കണ്ടത്.  കുടുംബമൊത്ത് താമസിക്കുന്ന പ്രവർത്തകരടക്കം സ്വന്തം പ്രയാസങ്ങളെ അവഗണിച്ചാണ്‌ ജോലി പോലും മാറ്റി വെച്ച് ഏറെ ‘റിസ്ക്കു’ള്ള ഈ സേവനം ചെയ്യുന്നതിനായി രംഗത്തെത്തിയിട്ടുള്ളത്.  കോവിഡ് പ്രോട്ടോകോൾ പാലിച്ച് മയ്യിത്ത് പരിപാലനത്തിന്‌ അർഹമായ ആദരവും മയ്യിത്ത് നമസ്ക്കാരമടക്കമുള്ള കർമ്മങ്ങളും നിർവ്വഹിച്ചാണ്‌ ഓരൊരുത്തരുടെയും മയ്യിത്ത് ഇവർ മറമാടുന്നത്. 

 

കിംഗ് ഫഹദ് മെഡിക്കൽ സിറ്റി, ശുമൈസി ആശുപത്രി എന്നിവിടങ്ങളിലെ ആരോഗ്യ പ്രവർത്തകർ, മോർച്ചറി ഉദ്യോഗസ്ഥർ, മൻസൂരിയ ഖബർസ്ഥാൻ, മയ്യിത്ത് പരിപാലന കേന്ദ്രമായ ദിറൈമിയയിലെ ഉദ്യോഗസ്ഥരും ജീവനക്കാരുമടക്കം വിവിധ മേഖലകളിലുള്ളവർ ഇവരുടെ പ്രവർത്തനങ്ങൾക്ക് പിന്തുണ നൽകി. മരണപ്പെട്ടവർക്ക് ജോലി ചെയ്ത കമ്പനികളിൽ നിന്നോ ഇൻഷുറൻസ് വഴിയോ കിട്ടാനുള്ള ആനുകൂല്യങ്ങളും നഷ്ടപരിഹാരവുമെല്ലാം വെൽഫെയർ വിംഗ് ഇടപ്പെട്ട് കുടുംബത്തിന്‌ ലഭ്യമാക്കാനുള്ള നടപടികൾ സ്വീകരിച്ചു വരുന്നു. നാട്ടിലെത്തിയാൽ

ആവശ്യമുള്ളവർക്ക് സി.എച്ച് സെന്റർ പോലുള്ള സംവിധാനങ്ങൾ ഉപയോഗപ്പെടുത്തി ആംബുലൻസ് സൗകര്യവും കമ്മിറ്റിയുടെ നേതൃത്വത്തിൽ ലഭ്യമാക്കാറുണ്ട്.

 

മയ്യിത്തുമായി മഖ്ബറയിലെത്തിയപ്പോൾ കുഴിച്ച ഖബറുകൾ തീർന്നതിനെ തുടർന്ന് ദാറുസ്സലാം പ്രവർത്തകരും അവിടെയുള്ള ജീവനക്കാരും കൂടി ഖബർ കുഴിച്ച് മയ്യിത്ത് മറവ് ചെയ്തത് വേറിട്ടൊരു അനുഭവമായിരുന്നുവെന്ന് വിംഗിലെ അംഗങ്ങൾ പങ്ക് വെച്ചു. അഞ്ചും ആറും മയ്യിത്തുകളായിരുന്നു ദിവസവും ഇവർ ഖബറടക്കിയിരുന്നത്.  ഒരു ദിവസം തന്നെ ഇരുപതോളം മൃതദേഹങ്ങൾ ഇവർ മറവ് ചെയ്തിട്ടുണ്ട്. ഏറ്റെടുത്ത മയ്യിത്തിന്റെ കർമ്മങ്ങൾ പൂർത്തിയാക്കി തിരിച്ചു വരാനൊരുങ്ങുമ്പോൾ മഖ്ബറയിലെത്തുന്ന മറ്റ് മയ്യിത്തുകൾ ഖബറക്കുന്നതിനും ഈ പ്രവർത്തകർ തയ്യാറാവാറുണ്ട്.

രാത്രി വൈകിയും മഖ്ബറകളിൽ മയ്യിത്ത് പരിപാലനവുമായി സജീവമാകുന്ന ദാറുസ്സലാം ഗ്രൂപ്പ് പ്രവർത്തനങ്ങളിൽ ആകൃഷ്ടരായി നിരവധി പേർ ഇവർക്കൊപ്പം പിന്നീട് പ്രവർത്തന രംഗത്തേക്ക് കടന്ന് വന്നതായി ഇവർ ചൂണ്ടിക്കാട്ടി. അറുപതിനപ്പുറം പ്രായമുള്ള  ഉമ്മർ അമാനത്തും ഈ കൂട്ടായ്മയിൽ അംഗമാണെന്നത്ഏറെ ശ്രദ്ധേയമാണ്‌.

 

അഷ്റഫ് വെള്ളാപ്പാടം, നജീബ് മമ്പാട്, മജീദ് പരപ്പനങ്ങാടി,  ശിഹാബ് പുത്തേഴത്ത്, റാഫി കൂട്ടായി,  ഇംഷാദ് മങ്കട, ഉനൈസ് കാളികാവ്, അനീസ് ബാബു വണ്ടൂർ, ജാഫർ കാളികാവ്, മുനീർ മക്കാനി, ജാസിം മഞ്ചേശ്വരം, നിയാസ് മൂർക്കനാട്, നജീബ് നെല്ലാങ്കണ്ടി,  സിദ്ദീഖ് ആനപ്പടി, മെഹബൂബ് കണ്ണൂർ, ഹുസൈൻ കുപ്പം, അബ്ദുൽ സമദ്, സമീർ ഇരുട്ടി, ഹബീബ് അൽ അബീർ, ഇർഷാദ് കയക്കോൽ, ഉസ്മാൻ ചെറുമുക്ക്, സുബൈർ ആനപ്പടി തുടങ്ങിയവരാണ്‌ പ്രവാസ ലോകത്തെ വേറിട്ട സേവന പ്രവർത്തനങ്ങൾക്ക് നേതൃത്വം നൽകുന്നത്.  റിയാദിൽ നിരവധി കാരുണ്യ പ്രവർത്തനങ്ങൾക്ക് ചുക്കാൻ പിടിക്കുന്ന റിയാദ് കെ.എം.സി.സിയുടെ പ്രസിഡണ്ട് സി.പി.മുസ്തഫ, ഓർഗനൈസിംഗ് സെക്രട്ടറി ജലീൽ തിരൂർ, സഹ ഭാരവാഹികളായ കെ.ടി.അബൂബക്കർ, മുഹമ്മദ് ഷാഹിദ് മാസ്റ്റർ, അബ്ദുൽ മജീദ് പയ്യന്നൂർ, അബ്ദുൽ മജീദ് പി.സി,  അലി പി.സി വയനാട് എന്നിവരും ഇവർക്ക് വേണ്ട ഉപദേശ നിർദ്ദേശങ്ങളുമായി രംഗത്തുണ്ട്. റിയാദ് കെ.എം.സി.സിയുടെ കോവിഡ് കാല സേവന പ്രവർത്തനങ്ങൾ സംഘടനാ ചരിത്രത്തിലെ ഒരു നാഴികക്കല്ലായിരിക്കും.