ആലുവ : നഗരത്തിലും സമീപപ്രദേശത്തുള്ള വ്യാപരസ്ഥാപനങ്ങളില്‍ മോഷണം വര്‍ദ്ധിച്ചു വരുന്ന സാഹചാര്യത്തില്‍ പൊലിസിന്റെ രാത്രി പാട്രോളിങ്ങ് ഊര്‍ജ്ജിതമാക്കണമെന്ന് ദി ആലുവ മര്‍ച്ചന്റ്‌സ് അസോസിയേഷന്‍ ദ്വൈവാര്‍ഷിക പൊതുയോഗ പ്രമേയം ആവശ്യപ്പെട്ടു. കഴിഞ്ഞ ദിവസം മുന്‍സിപ്പല്‍ ബസ് സ്റ്റാന്റിനു സമീപമുള്ള വ്യാപര സ്ഥാപനത്തില്‍ മോഷണം നടന്നത് ഗൗരവകരമായി കാണണം. രാത്രി കാലങ്ങളില്‍ നഗരത്തില്‍ തമ്പടിക്കുന്ന യാചകര്‍കും മറ്റും എതിരെ പൊലിസ് കൈ കൊണ്ടിരുന്ന നടപടികള്‍ ഇല്ലാതായത് സ്ഥിതികള്‍ വഷളാക്കിയെന്നും പ്രമേയത്തില്‍ ആരോപിച്ചു. അന്‍വര്‍ സാദത്ത് എം.എല്‍.എ ഉദ്ഘാടനം ചെയ്തു.അസോസിയേഷന്‍ പ്രസിഡന്റ് ഇ.എം നസീര്‍ ബാബു അധ്യക്ഷത വഹിച്ചു. കേരള വ്യാപരി വ്യവസായി ഏകോപന സമിതി ജില്ല പ്രസിഡന്റ് പി.എം.എ ഇബ്രാഹിം മുഖ്യപ്രഭാഷണം നടത്തി. അസോസിയേഷന്റെ വെബ് സെറ്റ് നഗരസഭ ചെയര്‍പേഴ്‌സണ്‍ ലിസി എബ്രാഹം ലോഗോണ്‍ ചെയ്തു. കേരള വ്യാപരി വ്യവസായി ഏകോപന സമിതി ജില്ല സെക്രട്ടറിമാരായ ടി.ബി. നാസര്‍, എ.കെ. പീയൂസ്, കെ.എം. ഹസന്‍, കെ.എച്ച്. ഷെഫീക്ക്, ഷാജഹാന്‍ അബ്ദുള്‍ഖാദര്‍, എം. പത്മനാഭന്‍ നായര്‍, കെ.സി. ബാബു, പി.എം. മൂസാക്കുട്ടി,എ.ജെ. റിജാസ് എന്നിവര്‍ സംസാരിച്ചു. ജനറല്‍ സെക്രട്ടറി എ.ജെ റിയാസ് പ്രവര്‍ത്തന റിപ്പോര്‍ട്ടും,ട്രഷറര്‍ ജോണി മൂത്തേടന്‍  വരവ് ചെലവ് കണക്കും അവതരിപ്പിച്ചു.