വിജയവാഡ: ആന്ധ്രാപ്രദേശിലെ വിജയവാഡയില്‍ യാത്രക്കാര്‍ ഉള്ളിലിരിക്കേ കാറിനു തീയിട്ടു. സംഭവത്തില്‍ പരുക്കേറ്റ മൂന്നുപേരെ ആശുപത്രിയില്‍ പ്രവേശിപ്പിച്ചു. റിയല്‍ എസ്റ്റേറ്റ് ബിസിനസുമായി ബന്ധപ്പെട്ടുണ്ടായ തര്‍ക്കമാണ് സംഭവത്തിലേക്കു നയിച്ചത്.

കഴിഞ്ഞ ദിവസം വൈകിട്ടായിരുന്നു സംഭവം. കാറിനു തീയിട്ടെന്നു സംശയിക്കുന്ന വേണുഗോപാല്‍ റെഡ്ഢിയെന്നയാളെ പിടികൂടാനായിട്ടില്ല. 

നേരത്തെ ബിസിനസ് പങ്കാളിയായിരുന്ന ഗംഗാധറും വേണുഗോപാലും പിന്നീട് പിരിഞ്ഞിരുന്നു. ഇതുമായി ബന്ധപ്പെട്ട കാര്യം ചര്‍ച്ച ചെയ്യാനായിരുന്നു ഗംഗാധറും ഭാര്യയും സുഹൃത്തും വേണുഗോപാലിനെ തേടിയെത്തിയത്. നാലുപേരും കാറിലിരുന്നു സംസാരിക്കുന്നതിനിടെ തര്‍ക്കമുണ്ടാകുകയും വേണുഗോപാല്‍ പുറത്തിറങ്ങി പെട്രോളൊഴിച്ച് കാര്‍ കത്തിക്കുകയുമായിരുന്നു.