- സെക്രട്ടറിയെ
സസ്‌പെന്‍ഡ് ചെയ്യണമെന്ന് കനിമൊഴി
ന്യൂഡല്‍ഹി: ആയുഷ് മന്ത്രാലയവുമായി ബന്ധപ്പെട്ട വെബിനാര്‍ ട്രെയിനിങിനിടെ ഹിന്ദി അറിയാത്തവര്‍ പുറത്തു പോകണമെന്ന് കേന്ദ്ര ആയുഷ് മന്ത്രാലയം സെക്രട്ടറി പറഞ്ഞതിനെതിരേ പ്രതിഷേധം.
ആയുഷ് സെക്രട്ടറി വൈദ്യ രാജേഷ് കോട്ടേച്ചയ്‌ക്കെതിരേ നടപടി ആവശ്യപ്പെട്ട് ഡി.എം.കെ എം.പി കനിമൊഴി മന്ത്രിക്ക് കത്തെഴുതി. ട്രെയിനിങിനിടെ സെക്രട്ടറി ഹിന്ദി സംസാരിച്ചപ്പോള്‍ ഇംഗ്ലീഷില്‍ കൂടി സംസാരിക്കാന്‍ പങ്കെടുത്തവരിലൊരാള്‍ ആവശ്യപ്പെട്ടപ്പോള്‍ തനിക്ക് നന്നായി ഇംഗ്ലീഷ് സംസാരിക്കാന്‍ അറിയില്ലെന്നും ഹിന്ദി അറിയാത്തവര്‍ പുറത്തു പോകണമെന്നും കൊട്ടേച്ച ആവശ്യപ്പെടുകയായിരുന്നു.
ഹിന്ദി അടിച്ചേല്‍പ്പിക്കാനുള്ള നീക്കം അംഗീകരിക്കാന്‍ കഴിയില്ലെന്നും സെക്രട്ടറിയെ സസ്‌പെന്‍ഡ് ചെയ്ത് അദ്ദേഹത്തിനെതിരേ അച്ചടക്ക നടപടി ആരംഭിക്കണമെന്നും കനിമൊഴി ആവശ്യപ്പെട്ടു.
ഹിന്ദി അറിയാത്തവരോട് അസഹിഷ്ണുത കാട്ടുന്നത് എങ്ങനെ അംഗീകരിക്കാന്‍ പറ്റുമെന്നും കനിമൊഴി ചോദിച്ചു. കോണ്‍ഗ്രസ് എം.പി കാര്‍ത്തി ചിദംബരവും ഇതെ ആവശ്യവുമായി രംഗത്തെത്തി. ഒരാള്‍ക്ക് ഇംഗ്ലീഷ് അറിയില്ലെന്ന് പറഞ്ഞാല്‍ മനസിലാക്കാം. എന്നാല്‍ ഹിന്ദി അറിയാത്തത് കൊണ്ട് നിങ്ങള്‍ ഇറങ്ങിപ്പോകണമെന്ന് പറയുന്നത് അംഗീകരിക്കാന്‍ പറ്റുമോയെന്ന് കാര്‍ത്തി ചോദിച്ചു.