മരട്: ബസില്‍ യാത്ര ചെയ്യുകയായിരുന്ന യുവതിയുടെ പണമടങ്ങിയ പേഴ്‌സ് മോഷ്ടിച്ച തമിഴ് സ്ത്രീകള്‍ മരട് പൊലിസിന്റെ പിടിയിലായി.
പൂത്തോട്ട എറണാകുളം റൂട്ടില്‍ സര്‍വ്വീസ് നടത്തുന്ന 'ശ്രീഭദ്ര' ബസ് രാവിലെ പേട്ടയില്‍ എത്തിയപ്പോഴാണ് ഉദയംപേരൂര്‍ സ്വദേശിയും സ്വകാര്യ സ്ഥാപനത്തിലെ ജോലിക്കാരിയുമായ യാത്രക്കാരിയുടെ പേഴ്‌സ് മോഷ്ടിച്ചത്.
ബസിനുള്ളല്‍ മനപ്പൂര്‍വം തിക്കും തിരക്കും ഉണ്ടാക്കി യാത്രക്കാരുടെ ശ്രദ്ധ തിരിച്ചതിന് ശേഷമാണ് മോഷണം നടത്തിയത്. സംഭവം ശ്രദ്ധയില്‍പ്പെട്ട യുവതിയും മറ്റു യാത്രക്കാരും ബഹളം വച്ചതിനെ തുടര്‍ന്ന് നിര്‍ത്തിയ ബസില്‍ നിന്ന് പ്രതികള്‍ ഇറങ്ങി ഓടുകയായിരുന്നു.
ഇവരെ വൈറ്റില മോബിലിറ്റി ഹബ്ബില്‍ നിന്ന്  മരട് പൊലിസ് സ്റ്റേഷന്‍ എസ്.ഐ സുജാതന്‍ പിള്ളയും സി. പി.ഒ.മാരായ ഷീല, ഷീബ എന്നിവരും ചേര്‍ന്ന് പിടികൂടി. മൂന്ന് ജോഡി വസ്ത്രങ്ങള്‍ ഒന്നിന് പിറകെ ഒന്നായി ധരിച്ചിരുന്ന പ്രതികള്‍ മോഷണത്തിന് ശേഷം വസ്ത്രം മാറ്റി രക്ഷപ്പെടുകയാണ് പതിവെന്ന് പൊലിസ് പറഞ്ഞു.
പ്രതികളെ കോടതിയില്‍ ഹാജരാക്കി റിമാന്റ് ചെയ്തു.