നാദാപുരം: ചത്ത പശുവിനെ പുഴയില്‍ തള്ളിയതായി ആക്ഷേപം . ഇന്നലെ രാവിലെയാണ് വിഷ്ണുമംഗലം പുഴയുടെ ജലസംഭരണിയോട് ചേര്‍ന്ന് അധിക ജലം ഒഴുകിപ്പോകാന്‍ നിര്‍മിച്ച കനാലില്‍ പശുവിന്റെ ജഡം നാട്ടുകാരുടെ ശ്രദ്ധയില്‍പെട്ടത്.
പുഴയുടെ കരയോട് ചേര്‍ന്നു നിര്‍മിച്ച മതിലിന് മുകളില്‍ നിന്നും ഇവിടേക്ക് തള്ളിയതായാണ് നാട്ടുകാര്‍ പറയുന്നത്. വടകരയിലേക്കുള്ള കുടിവെള്ളവിതരണത്തിനായിബണ്ട് നിര്‍മിച്ചിരിക്കുന്നത് ഇതിനോട് ചേര്‍ന്നാണ്.
നാലുമീറ്റര്‍ ഉയരത്തില്‍ കോണ്‍ക്രീറ്റ് ഭിത്തിയുണ്ടെങ്കിലും മഴ കുറഞ്ഞതിനാല്‍ ജലനിരപ്പ് വളരെ താഴ്ന്നിരിക്കുകയാണ്. ബണ്ടിന്റെ ഭിത്തി കടന്നു ഇവ താഴേക്കു പതിക്കാന്‍ സാധ്യത കുറവായതിനാലാണ് അജ്ഞാതര്‍ തള്ളിയതാണെന്ന സംശയം ഉയരുന്നത്. നാട്ടുകാര്‍ പൊലിസില്‍ പരാതി നല്‍കി.