വടക്കാഞ്ചേരി: മഹാപ്രളയവും ഉരുള്‍പൊട്ടലുകളും നാടിന് തീരാവേദന സമ്മാനിയ്ക്കുന്ന ഈ ഓണകാലത്തും ചിറ്റണ്ട ചെറുചക്കി ചോലയിലേക്ക് സന്ദര്‍ശക പ്രവാഹം.
സ്ത്രീകളും കുട്ടികളുമുള്‍പ്പെടെ നൂറ് കണക്കിന് പേര്‍ കിലോമീറ്ററുകള്‍ വനത്തിലൂടെ കാല്‍നടയായി ചെറുചക്കിയിലെത്തുമ്പോള്‍ സുരക്ഷ കടലാസില്‍ മാത്രം.
വനത്തിനുള്ളിലെ പ്രകൃതി രമണീയതയുടെ നിറകുടവും സംസ്ഥാന സര്‍ക്കാര്‍ ഇക്കോ ടൂറിസം പദ്ധതിയില്‍ ഉള്‍പ്പെടുത്തി നവീകരണം ഏറ്റെടുക്കുമെന്ന് പ്രഖ്യാപിയ്ക്കുകയും ചെയ്ത ചെറുചക്കി ചോലയില്‍ ജനങ്ങളെ നിയന്ത്രിയ്ക്കാന്‍ ഒരു ഉദ്യോഗസ്ഥന്‍ പോലും ഇല്ല എന്നതാണ് സ്ഥിതി. മിനി ഡാമില്‍ ഇറങ്ങി കുളിയ്ക്കുന്നവരില്‍ കുട്ടികള്‍ വരെയുണ്ട്. എന്തെങ്കിലും അപകടം സംഭവിച്ചാല്‍ ജീവന്‍ നഷ്ടപ്പെടുകയല്ലാതെ മറ്റൊരു മാര്‍ഗവുമില്ല. വനത്തില്‍ സാമൂഹ്യ വിരുദ്ധരുടെ വിളയാട്ടം വേറെയും.
വര്‍ഷകാലത്ത് ജലസമൃദ്ധിയുടേയും മനോഹര വെള്ളച്ചാട്ടത്തിന്റേയും പ്രതീകമാകുന്ന ചെറുചക്കി ചോല വേനലില്‍ നൊമ്പര കാഴ്ച്ചയാകും.
മിനി ഡാം ഇപ്പോള്‍ ജലസമൃദ്ധമാണ് . വേനലില്‍ ശോഷിച്ച് ചെറിയൊരു കുള സമാനമായി മാറും. മിനി ഡാമിന്റെ നവീകരണം അധികൃതര്‍ യഥാസമയം പൂര്‍ത്തിയാക്കിയിരുന്നെങ്കില്‍ മേഖലയിലെ ഏറ്റവും വലിയ ജലസ്രോതസായി ചെറുചക്കി ചോലയെ നിലനിര്‍ത്താനാകുമായിരുന്ന് എന്ന് നാട്ടുകാര്‍ പറയുന്നു.
സംസ്ഥാനത്തിന്റെ വിവിധ ഭാഗങ്ങളില്‍ നിന്ന് ഇപ്പോഴും നിരവധി പേര്‍ ചെറുചക്കി ചോലയിലെത്തുന്നുണ്ട്.
ഇവര്‍ക്ക് യാതൊരു സുരക്ഷിതവുമില്ലാത്ത കേന്ദ്രമായി ഈ ടൂറിസം കേന്ദ്രം മാറുമ്പോള്‍ അത് ദുരന്തങ്ങളില്‍ നിന്ന് പാഠം പഠിയ്ക്കാത്ത അധികൃതരുടെ അനാസ്ഥയുടെ പ്രതീകമായി അത് മാറുകയാണ്.